Tar sats for seg sjølv

— Det har vore ganske bra å starte eiga bedrift. Så langt har det vore god etterspurnad og fin flyt, fortel Fredrich Bakkedal Bjelland frå Sandeid, som bur i Etne.

Før han starta for seg sjølv, var han tilsett i Brødrene Mæland. Det same var etnebuen Jens Inge Holmen.

Breitt spekter

Gjennom arbeidslivet har Bjelland fått lang erfaring innan tømring og betong. På spørsmålet om kvifor han ville starte eige firma, svarar han at ein då jobbar for seg sjølv og byggjer seg sjølv opp.

— Ein blir flinkare i faget av å tenkje sjølv, seier Bjelland.

Den største forskjellen han har merka ved å drive eiga bedrift, er at han er sin eigen herre. Han leverer alt innan nybygg, rehabilitering, betonggolv, ringmurar, høgveggar og montering av stålpipe. Sandeidsbuen fortel at han tek på seg husbygging, restaurering og alt mogleg».

For tida er Bjelland innleigd av Brødrene Mæland til full restaurering av ei stor hytte på Vågslid, der òg Jens Inge Holmen er med. Han fortel at det er snakk om eit påbygg på om lag 60 kvadratmeter. Bjelland tek jobbar rundt om på Vestlandet.

— Eg har ulike prosjekt gåande i distriktet. Det har òg vore førespurnader på kaiar og brygger i Bergensområdet, samt innover mot Ryfylke, fortel Bjelland.

No i starten handlar det om å byggje seg sakte, men sikkert opp og få ein trygg økonomi for bedrifta, og så heller satse meir seinare. På lang sikt har han ambisjonar om å få eit stabilt og godt firma, kanskje med eit par tilsette.

— Eg har eit mål om å utvikle tomter, prosjektere bustadar og investere i eigedom, seier sandeidsbuen.

Heile prosessen

Jens Inge Holmen har hatt liknande opplevingar sidan han starta Holmen Bygg. Etnebuen fortel at det har gått veldig bra, med mykje jobb sidan oppstarten. Som for Bjelland var høvet til å vere sjølvstendig ein viktig motivasjon for å starte eige firma.

— Med eiga bedrift får du høve til å dykke litt meir inn i faget. Som tilsett er det ikkje alt du får innblikk i, medan no har eg ansvar for både kontorarbeid og snekring. Det er å kunne ta del i heile prosessen sjølv og få utfordringar, seier Holmen.

Den største forskjellen for han er å stå med alt ansvaret sjølv. På den eine sida kan han velje kva jobbar han vil ta, medan på den andre må han stå for alle utgiftspostar.

Hjelper kvarandre

Holmen driv med alt mogleg innan nybygg og rehabilitering. I tillegg til å vere med på større prosjekt, tek han òg småjobbar. Arbeidsområdet er hovudsakleg i Etne og Vindafjord, men han tek òg reisejobbar når det høver. Han peikar på at når ein er på reise og har familie, kan det vere krevjande.

For tida er han saman med Fredrich Bakkedal Bjelland som innleigd på Brødrene Mæland sitt hytteprosjekt på Vågslid. Dei har vore saman om fleire prosjekt, og Holmen meiner samarbeidet deira fungerer godt.

Per no er det ikkje aktuelt for etnebuen å tilsetje nokon i Holmen Bygg. Han forklarar at litt av grunnen til at han starta for seg sjølv, var at han ville ha berre seg sjølv å stole på. Skulle han støyte på utfordringar, føler han likevel ikkje at han står åleine.

— I tømraryrket hjelper me ofte kvarandre på tvers av firma. Me kan ringe kvarandre og be om hjelp, og folk stiller opp, fortel Holmen.

På kort sikt er ambisjonane å gjere godt handverk og klare seg sjølv i det daglege. I det lange løp vil han bli endå flinkare i jobben, gjere ein god jobb og utvikle seg til å bli betre.

— Målet er å bli så flink som mogleg. Ein blir aldri heilt utlært, seier etnebuen.

Populært med praktisk

Bustadbygginga i Etne og Vindafjord er ifølgje Holmen prega av variasjon og periodar med både nybygg og oppussing. Mange vel å satse på eksisterande bustader, samstundes som andre ønskjer noko heilt nytt.

— Mange har tomter og hus og vel å pusse opp, medan andre vil ha nytt. Det går litt i rykk og napp, seier Holmen.

Han peikar på at det ikkje berre er bustadtypen som er avgjerande, men òg løysingar som gjer kvardagen enklare. Etnebuen forklarar at folk vel å oppfylle sine behov og ønskjer.