Tar over etter historisk bakeri

— Å driva kafé på senteret blir bra. Me satsar på husmannskost, catering og take away, seier dagleg leiar Ozcan Mestanli i Biografen AS.

Planen er opning 1. oktober. Fire tilsette, to i full stilling og to på deltid, skal driva kafeen.

Vil nå lokalbefolkning

Mestanli driv selskapet saman med sambuaren Andra Atomi, og både lunsj og middag er ein del av profilen deira. Dei har frå før lokasjonar i Haugesund, Aksdal, Etne Senter og Vikedal Kro og Motell.

I Etne og Vikedal går det ifølgje Mestanli veldig bra. Konseptet blir det same, men på Ølen Senter vil dei satsa endå meir på lokalbefolkninga enn på desse plassane.

— Det bur ein god del folk i Ølen. I Etne og Vikedal er det å plukka opp dei som køyrer forbi ein viktig del av det, forklarar den daglege leiaren.

Økonomien var krevjande for Christiansen Bakeri på senteret, men Mestanli opplevde i dialogen med dei at senterleiinga har tru på at det er større potensial der om dei byter konsept, og han trur at dei skal kunna klara seg betre.

Møteplass

Merete Vårvik Matre, som representerer eigaren Ølen Eiendom AS, tok over som styreleiar i Christiansen AS i juni. Ho har leia prosessen fram mot nedlegginga og arbeidet med å få Biografen Cafe på plass. Økonomien var hovudforklaringa bak nedlegginga.

— Me klarte ikkje heilt å få den omsetnaden og dei resultata me hadde håpt på. Det trur eg er litt gjengs for små nisjebakeri i distrikta, dessverre, seier Matre.

Under prosessen der dei utforska høve for å tilsetja ein ny dagleg leiar, tok ho kontakt med Mestanli i sommar med tanke på ei mogleg alternativ drift. Ho fortel at ho har eit utruleg godt inntrykk av han, og høyrer mykje godt om Biografen frå dei andre bygdene der dei er.

Senterleiinga har opplevd at det har vore eit ønskje frå folk om varm mat, og gler seg over at det nye konseptet fyller dette behovet. For Ølen Senter handlar det om aktivitet, å få flest mogleg folk inn. Matre fortel at dei har ein positiv trend, og trekk linjene vidare til NAV-bygget som opnar sommaren 2026.

— Det eg har sett på Ølen Senter, er ein møteplass, spesielt for eldre. Eg er glad for at me klarer å føra det vidare med Biografen, seier Matre.

Ho trur det er potensial for at ein kafé på Ølen Senter kan lukkast, og viser til godt besøkte arrangement og trøkket når det skjer noko i Ølen. Stordriftsfordelane til Biografen som kjede meiner ho kan bidra til at det går bra for dei.

Slutt på ein epoke

Med det nye kapittelet på Ølen Senter tar ein annan del av Ølen si historie slutt. Christiansen Bakeri AS blei starta av Olav Christiansen i Sjoratgata i 1935, som eit av dei første elektriske bakeria i Sunnhordland.

Son hans, Torstein, tok over i 1968. I 1998 leigde Leirvik Dampbakeri lokala, men dei gjekk konkurs i 2018. Då starta Magne Christiansen, oldebarn av grunnleggar Olav, saman med Anne Karen Strand Eikeland opp att bakeriet gjennom å stifte Christiansen AS. I 2022 blei verksemda selt og flytta til Ølen Senter.

— Eg har same assosiasjon som alle andre har til bakeriet: skulebollane frå Sjoargata. Det er vemodig å vere med på å leggja ned eit etablert varemerke. Men det skjedde ei endring då bakeriet flytta til senteret, seier Matre.

Magne Christiansen hadde eit tett og nært forhold til familiebedrifta, men fortel at han berre har følt seg som ein vanleg kunde sidan salet i 2022. Planen var eigentleg å avvikla bakeriet før senteret kom på banen, så han har ikkje vonde kjensler for at det no blir lagt ned. Han begynte tidleg å jobba i Sjoargata.

— Eg er fødd og oppvaksen i eit bakeri, og eg har åte mine bollar opp gjennom åra, fortel Christiansen.

Han skulle gjerne sett at det framleis var eit bakeri i Ølen som baka alt frå botnen av, men innser at det er vanskeleg slik samfunnet har blitt.

— Uansett er det kjekt at det kjem inn noko nytt på senteret som kan ta det vidare, avsluttar Christiansen.