Kommunalsjef Mona Rasmussen Sævik for oppvekst i Etne kommune er glad for at dei får kvalifiserte søkarar til stillingane sine.
ARKIVFOTO: TORSTEIN TYSVÆR NYMOEN
Tar grep mot uønskt åtferd
Som i resten av landet opplever også Etne kommune ei auke i utagerande åtferd blant unge. No tar kommunen eit nytt initiativ til at barnehagar, skular og heimane skal samarbeide om å motverke den negative utviklinga.
— Det har vore ei auke i utagerande åtferd den siste tida i både barnehage og skule. Dette ønskjer me sjølvsagt å ta tak i, og me treng føresette tett med i arbeidet, seier kommunalsjef for oppvekst i Etne kommune, Mona Rasmussen Sævik.
Ho fortel at det blir jobba mykje med å skapa trygge og gode dagar i einingane i kommunen, og at ein i det siste halvåret har arbeidd aktivt med å utvikla ein eigen plan for å førebyggja omsorgssvikt og utagerande åtferd blant barn og unge i kommunen. Arbeidet har involvert både barnehage, skule og heimane, med representantar frå Foreldra sitt arbeidsutval (FAU) både frå barnehage og skule. I tillegg har støtteeiningane PP-tenesta, barnevern, helse og Nav vore med i arbeidet.
— Kommunen ønskjer å leggja til rette for trygge og gode oppvekstvilkår for alle barn og unge, og dette krev eit tett samarbeid mellom tenestene og heimane, understrekar ho.
