Sveinar satsar på sola: – Det er utruleg kjekt å sjå kor mykje straum eg produserer

— Eg har alltid vore opptatt av enøk, fortel Sveinar Kringlebotten, som allereie på 1990-talet begynte å installera varmepumper for kundar, lenge før det blei vanleg.

Men for fem år sidan tok interessa for fornybar energi eit nytt steg, då han oppdaga potensialet i solceller.

– Eg tenkte Søren, dette må eg prøva!» Eg installerte sjølv eit anlegg på huset mitt, betalte 350.000 kroner. Då eg såg kor bra dette var, blei eg heilt frelst, seier han.

Starta solcelle-bedrift

Erfaringa frå eige tak inspirerte han til å starta Solcelle Vestland, eit samarbeid mellom fleire elektroinstallatørar frå Etne, Bømlo og Bergen.
— Me starta i august og selde for 13 millionar til jul same året. Det var heilt vilt, fortel han.

Dei første åra gjekk salet svært godt, men då straumprisane gjekk ned og støtta frå Enova blei redusert, dabba interessa noko av. Likevel er Kringlebotten tydeleg på at kundane hans er fornøgde.

— Eg har ikkje hatt ein einaste kunde som har angra på at han kjøpte solceller. Dei har låge straumrekningar og høg produksjon – i 25 år framover, seier han.

For å ta neste steg starta Kringlebotten også Batteri Vestland, eit selskap som leverer batteripakkar til både solcellekundar og andre som ønskjer å lagra straum.
— Batteripakkane er det nye store. Eg fekk installert min eigen for eit halvt år sidan, og har nesten null kjøp av straum no. Det er utruleg kjekt å sjå, seier han fornøgd.

Han fortel at systemet fungerer heilt automatisk, ved at han produserer straum på dagen og brukar av batteriet om natta. Når straumprisen er høg, kan han selja overskotet til spotpris. Det går heilt av seg sjølv.

Investering for framtida

Kringlebotten meiner solceller og batteripakkar er ei investering som handlar om meir enn berre økonomi.
– Folk spør ofte etter innteningstida på investeringa, men eg tenkjer det på ein annan måte. Me er villige til å tapa 70.000 i året på bilen vår, men synest det er dyrt å investera i noko som gir oss straum i 25 år? Det forstår eg ikkje heilt, seier han retorisk.

Han meiner solcelleanlegg aukar verdien på huset og gir tryggleik i ei tid med svingande straumprisar.
Han meiner satsinga på solkraft og batteri ikkje berre hjelper kvar enkelt husstand, men også samfunnet, for når mange brukar straum samtidig, eksempelvis klokka fire om ettermiddagen, blir det stor belastning på straumnettet.

— Men med batteri og solceller slepp du å bruke straum på same tid som alle andre. Det hjelper både deg og straumnettet, seier Kringlebotten.