Svarar om tursti

Aller klarast i talen er Mats Årvik (Frp) og Åge Opheim (H). Dei omtalar tursti-prosjektet som eit kjempeflott tiltak og viser til effekten dagens sti frå Opheim parkeringsplass til Olalia har hatt.

— Slikt får folk ut, seier Opheim.

Prosjektet er eit samarbeid mellom turlag, fleire idrettslag og grunneigarar på begge sider av kommunegrensa mellom Etne og Vindafjord. Saka skal behandlast i hovudutvalet i Etne på onsdag. Som Haugesunds Avis var først til å omtale går det mot fleirtal for å seie ja i Etne.

Tursti-saka stod ikkje på programmet under formannskapsmøtet i Vindafjord tysdag. Den kjem opp i eit møte i Utval for drift og utvikling (DUK) ved eit seinare høve.

Tilbakehalden ordførar

Både Øyvind Valen (Ap) og varaordførar Gustav Løge Fosse (KrF) er i utgangspunktet positive til å la det bli bygd ein tursti mellom Rus og Olalia. Valen understrekar at det må vere ein forholdsvis smal sti som ikkje er tilrettelagt for motoriserte køyretøy. Løge Fosse viser til folkehelse-perspektivet.

Anna Klette Steinsland fortel at Vindafjordlista ikkje har hatt spørsmålet om tursti formelt oppe til debatt i gruppa ennå, men at dei i diskusjonane dei har hatt internt så langt er dei positive til prosjektet i den forma det er nå. I Senterpartiet er dei meir tilbakehaldne med synspunkta om turstien.

— Eg ventar til saka skal til behandling, seier ordførar Ole Johan Vierdal (Sp), som viser til at det er DUK som skal ha saka.

Han understrekar at Etne har den lengste strekka av den planlagde stien. Vierdal sine to partikollegaer i formannskapet, Monica Nesheim og Nina Karin Ramsfjell, ønskjer ikkje å uttale seg om saka på det nåverande tidspunktet.

Sjølv om ingen i formannskapet fremma skepsis til prosjekt finst det også motstemmer i Vindafjord-politikken. Guri Ravatn (SV) fortel at ho per i dag har sympati med Vindafjord-administrasjonen og Statsforvaltaren, som har gitt signal om at prosjektet ikkje kvalifiserer til å få løyve slik det står nå.

— Her er døme på naturtap, meter for meter, seier Ravatn.

Ho understreker at hennar endelege standpunkt først vil komme etter Etne sitt endelege vedtak og at det kjem sakspapir i Vindafjord. Ravatn sit i DUK.

Saka har skapt stort engasjement, og fåttfleire til å skrive lesarinnlegg:

Ventar på Etne

Initiativtakarane har jobba med ein dispensasjonssøknad for å få prosjektet godkjent i Vindafjord. I eit brev 18. desember skreiv einingsleiar Thomas Vestbø for areal og forvaltning, som er sakshandsamar, at dei frå Vindafjord kommune si side ikkje såg at det kunne innstillast på eit positivt vedtak, slik søknaden låg føre då.

— Det handlar ikkje om vilje frå oss i kommuneadministrasjonen si side, men om at lova sine krav ikkje kan oppfyllast slik søknaden ligg føre nå, skreiv Vestbø den gongen.

I januar har Vestbø hatt dialog med initiativtakarane. Han har blitt informert om at dei ikkje ønskjer å gå vidare med søknaden som ein dispensasjonssak nå. Som følgje av dette har Vestbø sete saksbehandlinga på pause fram til dei høyrer frå initiativtakarane igjen. Saka var derfor ikkje sa oppe i behandling i DUK sitt møte på måndag. Tysdag fortel Vestbø at dei framleis ventar på tilbakemelding frå initiativtakarane før dei sett i gang igjen.

Dei to neste møta i DUK er 4. mars og 15. april. Kva for eit av desse møta saka eventuelt kjem opp i er førebels usikkert.

— Me ventar på behandlinga i Etne før me set i gang prosessen i Vindafjord, seier Arne Gunnar Habbestad i Ølen IL, som står bak søknaden.

Han viser til at 80 prosent av stien er i Etne. I ei politisk behandling har politikarane høve til å gå imot administrasjonen og likevel godkjenne søknaden. Statsforvaltarane i både Vestland og Rogaland kan komme med motsegn mot løyva kommunane eventuelt gir.

Grannar opplyser: Øyvind Valen er styreleiar i Grannar. Grannar er politisk uavhengig. Redaksjonen står fritt og redaktøren åleine svarar for alle redaksjonelle vurderingar.