Suksess med bilar
Over 100 personar ville sjå på bilane under amcar-treffet West Coast National på Old River Saloon i helga. For ølensbuane Anne Karin Gordon, Daniel Gordon Grundberg (10), Erlend Leknes Tysse (10) og Njål Aleksander Gordon Kleppe (5) blei det eit svært koseleg besøk i Etne.
— Det er veldig kjekt på treffet. Her er det fine bilar og kjensfolk, seier Erlend Leknes Tysse (10).
Laurdag var han med Anne Karin Gordon og barna Daniel Gordon Grundberg (10) og Njål Aleksander Gordon Kleppe (5), og såg på utstillinga rundt Old River Saloon. Han har vore med familien rundt omkring for å sjå på bilar tidlegare også. Daniel er einig med Erlend, og synest det var spesielt kult å sjå når bilane kom køyrande. Folk i alle aldrar gjekk rundt og utforska bilane.
Annonse
— Biltreff er ein koseleg familieaktivitet. Det er kjekt når ungane snakkar om kva bilar dei vil ha når dei blir store, seier Anne Karin.
Godt fellesskap
West Coast National gjekk frå fredag til søndag. Etne og Vindafjord Motorklubb var arrangør med hjelp frå fleire klubbar frå regionen. Over 70 bilar (sjå mange av dei i bildekarusellen) var med på den store utstillinga laurdag, og folk frå nær og fjern kom for å kikke.
Blant dei mange bilinteresserte som tok turen, var Vanja Jamne Eikemo frå Skånevik. Ho synest det er fint å sjå at ein slik liten plass kan trekke til seg eit slikt fellesskap, og omtalar bilinteresse som ein fin hobby.
Annonse
— Det skulle vore fleire slike treff. Dette er eit veldig inkluderande fellesskap der alle er med, seier skåneviksbuen.
Ho ønskjer at det fanst endå fleire tilbod for rånarar og bilentusiastar. Sjølv har ho vore på mange treff, blant anna Volvo-treff i Røldal og Ål.
Måtte tilbake til Etne
Treffet på Saloonen skapte campingliv på parkeringa like ved. Her hadde Einar Høgberg og ekteparet Bjørg Eikås-Søreide og Jim Søreide slått seg ned. Høgberg og ekteparet køyrde til Etne med kvar sin van som dei overnatta i.
Ekteparet var blant dei som reiste lengst, med det dei omtalar som ein kjekk tur over fjella på 5,5 timar frå Åmli. Dei hadde også med hunden Pia.
— Her er det kjempekoseleg. Ein blir kjent med folk med ein gong ein kjem her. Det funkar òg bra å ha hund på treff, fortel Jim.
Annonse
For Høgberg var dette fjerde gong han var på treff i Etne. Hallingdølen, som bur i Bergen, synest det er ein fin plass og har gode erfaringar frå tre van-treff for nokre år sidan, der han minnast eit stort trøkk med folk frå heile landet i bygda.
— Då eg fekk vite at det skulle vere eit treff i Etne, var det lett å bestemme seg for å komme igjen, seier Høgberg.
For Vidar Lønning og sonen Lukas Lønning (13) var reisa litt kortare. Dei kom frå Bømlo og hadde ein bil på utstilling, og koste seg på treffet. Tidlegare har dei vore på Etne og Vindafjord Motorklubb si årlege utstilling under Sjordagen i Ølen. Det har også Roy Rørvik, Monica H. Enæs, Rune Enæs, Line Anita Øvstebø og Sigbjørn Øvstebø, som stod for nokre av dei ti bilane frå Kvinnherad på utstillinga.
— Me må støtte opp naboklubbane når det blir laga til noko, seier Line Anita.
Kvinnheringane var godt fornøgde med treff, vêr og kebaben dei kjøpte på Saloonen. Linda Hjelmtveit synest det er veldig kjekt å jobbe i baren under eit amcar-treff og ser fram til neste gong.
Stor dugnad
Annonse
For Etne og Vindafjord Motorklubb var det stort å få besøk frå bilar og folk frå rundt omkring i landet. Med litt hjelp frå andre klubbar og rundt ti medlemmer fekk dei rigga til treff, og halde orden på parkeringa med bilar som kom til undervegs laurdag.
— Arrangementet har gått knallbra. Det er mange bilar og me har vore heldige med vêret, seier Ingvard Vaka, som stilte på dugnad for klubben.
Han hadde to bilar stilt ut: ein lilla Dodge 1934 som han har hatt i 15 år, og ein Chevrolet 1954 som han har eigd i to år.
Klubben har jobba med arrangementet sidan februar. Leiar Birger Magne Agasøster seier at dei er ein liten klubb som er avhengige av at andre stiller opp, og sender ein stor takk til hjelparane.
— Treffet har gått over all forventning, både med vêret og deltakarar, fortel Agasøster.
Oppturen starta med ein camp på fredagen, der rundt 30 personar var med på ei sosial samling på Saloonen. Originalt var planen å ha line dance-kurs laurdag kveld, men planen blei endra til øksekast-konkurranse. Agasøster roser Saloon-eigar Rune Kringlebotten for å ha stått på og komme med idear til treffet. Etter suksessen i Etne rettar klubben fokus mot si årlege utstilling under Sjordagen i Ølen 30. august.
