Stortrivst som fengselsbetjent-student

Årleg søkjer mellom 800 og 1.200 personar seg til Kriminalomsorgens høgskule og utdanningssenter KRUS på Lillestrøm. Utdanningssenteret er åleine om å tilby fengselsbetjentstudie her til lands og har søkjarar frå heile landet som ynskjer seg ei utdanning innan kriminalomsorg.

For Magnhild Hundhammer frå Ølen var det rein slump at ho bestemte seg for å søkja skulen på Lillestrøm. Det har ho ikkje trega på.

— Eg stortrivst i yrket og eg er nøgd med alt i studiet. Det er spennande og interessant, seier 24-åringen som hoppa over på fengselsbetjentutdanning etter å ha tatt fagbrev som helsefagarbeidar.