Stort steg mot betre E134
Statsforvaltaren i Rogaland trekker motsegnene sine mot Vegvesenet sine planar for E134 Ølen-Fikse.
Dette kjem fram i eit brev signert fylkesmiljøvernsjef Marit Sundsvik Bendixen og seniorrådgivar Anne Stensland hos Statsforvaltaren sendt til Vegvesenet 15. august.
— Statsforvaltaren i Rogaland har vurdert løysingsforslaga, og med atterhald om at førespegla løysingsforslaget, våre innspel i dette brevet og at dei føreslegne føresegna blir lagt til planen, finn me tilstrekkeleg grunnlag til å trekke motsegna, skriv dei.
Annonse
Brevet er svar på i oppmoding om å trekke motsegnene som Statens vegvesen sendte til Statsforvaltaren 4. juli.
Må rette lovbrot
Vegvesenet la planforslag for utbetring av E134 frå Ølen til Mørkeli ut på høyring 13. november 2023. 12. januar i år kom Statsforvaltaren med motsegn til manglande tilrettelegging for anadrome (laks og sjøaure) og katadrome (ål) fiskeartar, risiko for spreiing av framande artar og område for masselagring.
Etter det starta ein prosess med å løyse utfordingane før prosjektet kunne gå vidare. I brevet blir det opplyst at Vegvesenet og Statsforvaltaren har hatt dialogmøte 7.- og 22. februar og 30. mai. Før møtet 30. mai oversendte Vegvesenet eit løysingsforslag til motsegna. Løysingsforslaget Statens vegvesen sendte 4. juli reflekterer det tidlegare løysingsforslaget, og innspela Statsforvaltaren kom med i dette møtet.
Annonse
Eit av motsegna tok tak i tiltak som allereie var gjort, nemleg det Statsforvaltaren omtalar som ulovlege bekkelukkingar i Oselva, som er eit anadromt vassdrag. Dei skriv at desse ulovlege tiltaka har ikkje tatt omsyn til fiskevandring, og representerer nye vandringshinder for stadeigne fiskeartar. 2. mai sendte Statsforvaltaren eit pålegg om retting av desse tiltaka. For å imøtekomme motsegna er planforslaget endra, slik at utvidinga av E134 vil skje mot aust/inn i terrenget, og dagens vegkant mot bekkeløpet vert liggande.
— Dette gjer at ein får tilbake handlingsrommet som ein hadde før bekkelukkinga, og elveløpet kan opnast, skriv Statsforvaltaren.
Med atterhald om at planen vert endra i tråd med den førespegla løysinga, finn Statsforvaltaren tilstrekkeleg grunnlag for å trekke motsegna. Tiltaka vil i det videre bli følgt opp i eiga saksgang i samband med pålegg om retting.
Politisk behandling
Til det originale planforslaget fremma Statsforvaltaren motsegn då føresegna ikkje tek tilstrekkeleg omsyn til å oppretthalde funksjonen vassdraga i planområdet har for fisk. For å sikre at alle aktuelle vassdrag har likelydande føresegn som sikrar økologisk funksjon, krav Statsforvaltaren at føresegna blir endra. Dei skriv at der er viktig at det kjem fram i føresegn og det endra planforslaget, at det nye bekkeløpet vert forma slik at det toler forventa flaummengde utan at det blir danna nye kortare elveløp.
Statsforvaltaren fremja også motsegn til manglande handtering av framande artar, då anbefalingar i høve handtering av framande arter ikkje er følgt opp i føresegna, og område for mellombels masselagring som ligg ved vassdrag.
Annonse
For å imøtekome motsegna om masselagring blir planforslaget endra, slik at grensa for midlertidig bygge- og anleggsområde mellom Oselva og ny vegfylling blir trekt inn så mykje som mogleg. Berre areal som er naudsynt for å etablera vegfyllinga og dei nye bekkeløpa nedstrøms fyllinga blir regulert. I Vegvesenet si oppmoding om å trekke motsegna kjem det fram at det nye bekkeløpet skal bli lagt inn i plankartet med enten Naturområde i sjø og vassdrag med tilhøyrande strandsone eller LNF-/naturføremål.
— Det er viktig med ein tilstrekkeleg kantsone med høg kvalitet langs dette nye bekkeløpet, dette har me også peikt på i tidlegare dialog, skriv Statsforvaltaren.
I tråd med dette oppmodar dei Vegvesenet om å velje Naturområde i sjø og vassdrag med tilhøyrande strandsone, og å fastsetje føresegn om storleik og kvalitet på kantsona. Dei minner og om at YM-planen må sendast oss i samband med søknad om fysiske tiltak i vassdrag.
For å løyse motsegnene har Vegvesenet foreslått ei rekkje nye føresegn (sjå faktaboks) som erstatning eller tillegg til dei som var frå før. Med atterhald om at planen blir endra i tråd med desse trekker Statsforvaltaren sine motsegn.
Vidare saksgang på denne planen blir at Statens vegvesen oppdaterer planforslaget sitt, som dei deretter sender til Vindafjord kommune for saksbehandling. Einingsleiar Thomas Vestbø for areal og forvaltning fortel at når dei tar imot forslaget vil dei saksbehandle det og levere det til endeleg politisk behandling i formannskap og kommunestyret. Dei har ikkje fått ein oppdatert plan frå Vegvesenet ennå.
