Stor interesse for E134-planar

— Der er kjekt at folk kjem innom for å diskutere utfordringar. Me er veldig positive til å høyre folk sine meiningar. Dersom folk kjem med innspel som kan betre planane våre er det veldig bra, seier prosjektleiar Arild Kalleland Vallestad i Statens vegvesen.

Han fortel at Vegvesenet merkar at dette er ein veg som er ønska og var godt fornøgd med oppslutnaden om møtet. Frå opninga på formiddagen var det eit jamt sig med folk innom møterommet.

Kalleland Vallestad håpar på byggestart i 2024, og fortel at Vegvesenet siktar seg inn mot planvedtak i begge kommunane i mai neste år. Han ser for seg to til to og eit halvt års byggetid før prosjektet er klart.

Skepsis mot fartsauke

På møterommet var det hengt opp teikningar med den planlagde traseen på veggane, samt at prosjektleiar Lars Roald Kringeland i Norconsult viste fram 3D-illustrasjonar av ulike område på ein skjerm.

Blant dei som var innom rundt lunsjtider var søstrene Gerd Rødne og Brit Rødne. Begge bur i Rødne, og har hus som blir påverka av det planlagde nye Hiksdal-krysset. Dei er positive til prosjektet og blei beroa av det dei fekk høyre på møtet.

Sjølv om den generelle stemninga var at det er tydeleg at dei aller fleste ønskjer seg gul stripe mellom Etne og Ølen var det også nokre kritiske røyster mot planane. Arrangørane blei konfrontert med skepsis mot å auke fartsgrensa frå 60- til 80 kilometer i timen ved avkøyringa til Olalivegen. Seniorrådgivar Sissel Aarvik for areal og forvaltning i Vindafjord svarte at dette var eit godt innspel. Spørsmålsstillaren avslutta med å understreka at han var glad for ny veg, men berre ønskte at det aktuelle krysset skal bli gjort betre enn det er planlagt.

Viktig veg

Prosjektleiar Lars Roald Kringeland i Norconsult var godt fornøgd med møtet. Rundt lunsjtider såg både han og leiar Eileen Pedersen Selland for utvikling i Etne for seg at det skulle komme ennå fleire innom etter vanleg arbeidstid på ettermiddagen. Pedersen Selland merkte seg at det gjerne kunne vere fleire etnebuarar innom.

— Dette er ein veldig viktig veg for Etne kommune. Mange pendlar på E134, seier Pedersen Selland.

Ho synest det er bra at det er lagt opp til ein stor grøfteprofil som gjer vegen meir oversiktleg, i tillegg til forsterka midtoppmerking, og trur dette blir eit stort løft for vegen. Kollegaen Aarvik i Vindafjord er tydeleg på at gul stripe-prosjektet er viktig også om Bakka-Solheim-prosjektet kjem, og understrekar at det ikkje er noko konkurranse mellom desse prosjekta.