Stor avtale for Omega-selskap

— Denne avtalen gjer oss godt rusta for den auka aktiviteten me ser dei komande åra, seier Trond Berge, administrerande direktør i Omega Subsea, i ei pressemelding.

Leveringa av dei 12 ROV-systema er planlagd til 2026, og avtalen inneheld òg ein opsjon på opptil 10 ekstra system i åra 2027 og 2028. Åtte av dei første systema skal støtta fartøys- og subseaoperasjonar for Solstad, medan fire er tiltenkte andre kundar.

Omega Subsea er ein del av Omega-konsernet med hovudkontor i Ølensvåg. Dei leverer ROV-tenester og konsulentar med spesialkompetanse innan undervassoperasjonar til offshoreindustrien. Selskapet er involvert i prosjekt innan olje og gass, fornybar energi og marin infrastruktur, og har ifølgje pressemeldinga eit tydeleg fokus på langsiktig driftsstabilitet. I tillegg til ROV-operasjonar tilbyr Omega Subsea eigne survey- og posisjoneringstenester som støttar offshore-konstruksjon og inspeksjon. Dei har hovudkontor i Bergen og avdelingskontor på Randaberg og i Aberdeen.

Framtidsfokus

I pressemeldinga står det at investeringa styrkjer Omega Subseas kapasitet og fleksibilitet i ein marknad der etterspurnaden er aukande. Berge poengterer at dei opplever vekst både innan tradisjonell olje- og gassverksemd og i nye område som havvind og kabelprosjekt.

— Med ein moderne ROV-flåte får me fleksibiliteten som krevst for å levera raskt, påliteleg og i tråd med kundane sine forventningar. Avtalen gir oss både kapasitet og tryggleik i ein viktig utviklingsfase, seier direktøren.

Investeringa i nytt utstyr er ein del av Omega Subseas langsiktige strategi for å byggja kapasitet og sikra driftsstabilitet over tid. Behovet for integrerte leveransar på tvers av verdikjeda aukar, og ein større ROV-flåte gir selskapet betre tilgjenge og kortare leveringstider. Omega Subsea vil ha ansvar for mobilisering, drift og vedlikehald av systema. Kvart system er utvikla for operasjonar på djupt vatn, med særleg vekt på driftsevne, effektivitet og pålitelegheit.

— Tilgang til rett teknologi og sterke samarbeidspartnarar er avgjerande for å levera kvalitet i krevjande operasjonsmiljø, seier Berge.

Samarbeid over fleire år

Administrerande direktør i Kystdesign, Tore Nedland, er – i likskap med Berge – glad for å ha inngått avtalen.

— Me set stor pris på den tilliten Omega Subsea har vist oss gjennom denne kontrakten. Avtalen er eit resultat av det positive samarbeidet me har utvikla dei siste åra, seier Nedland.

Ifølgje Berge gjer det nye utstyret at Omega Subsea kan ta på seg større og meir langvarige prosjekt – både for eksisterande og nye kundar, og i nye marknader.

— Investeringa i moderne utstyr, kombinert med eit tett samarbeid med Kystdesign, gjer oss godt posisjonerte for å levera trygge, effektive og pålitelege subseatenester framover, avsluttar han.