Nortura sitt slakteri blir stengt ned etter at tre tilsette er smitta av covid-19. Alle 60 tilsette skal testast.
Arkivfoto: Espen Mills/etnebilder.no
Stengjer slakteriet etter smitteutbrot
Det stadfester fabrikksjef Britt Randi Stokkevåg overfor Grannar. Det var tysdag ettermiddag dei positive prøvane kom, og i samråd med kommuneoverlegen i Vindafjord, Terje Kleiven, valte leiinga å stengja heile anlegget i Sandeid.
Slakteriet er nett ferdig med lammesosngen og nedstenginga berører rundt 60 personar.
— Dei tre som er smitta er heimehøyrande i Grannar-distriktet. Dei jobba nær kvarandre i slakterihallen, og har truleg ikkje smitta andre. Me har likevel valt å stengja ned alt, ut veka i første omgang, for å testa alle som jobbar i slakteriet. Svaret på prøvane vil avgjera når me kan opna igjen. Me har ingen grunn til å tru at fleire er smitta, og håpet er at dette tiltaket med full nedstenging vil gjera at me raskt får kontroll på situasjonen, seier Britt Randi Stokkevåg.
