Statssekretær om kraftlinja: — Viktig at det ikkje går for lang tid

Utgreiingar kring jord- og sjøkabel som eit alternativ i Statnett sin omstridde søknad om luftlinjetrasé frå Blåfalli Kvinnherad til Haugaland Næringspark i Gismarvik i Tysvær, er ein del av det Olje- og energidepartementet (OED) no ser på i arbeidet med Statnett sin søknad om Blåfalli-Gismarvik-linja.

Det stadfestar statssekretær Elisabeth Sæther (Ap) i OED overfor Grannar. Som Grannar melde fredag hadde Etne kommune og OED eit Teams-møte om saka fredag. Det kom i stand etter kommunen kravde dette etter å ha fanga opp signal om at ei avgjerd straks skal vere klar.

— Godt og ærleg møte

På Grannar sitt spørsmål til statssekretæren om det kom fram noko i møtet departementet ikkje visste frå før, svarar Sæther diplomatisk.

— Det er viktig for oss å ha ein god dialog med kommunane som er ein del av prosjektet. Det var eit godt og ærleg møte kor Etne kommune, ved varaordføraren, gav ein god gjennomgang av saka, seier Sæther til Grannar måndag.

— Etne kommunestyre har gjort eit samrøysta vedtak om at kommunen ønskjer ei ekstern utgreiing av jord- og sjøkabelalternativet. Korleis stiller departementet seg til det spørsmålet?

— Noko av det me ser på er om dette er utgreidd godt nok tidlegare i prosessen, og om behovet står seg eller ikkje, seier ho.

Sjølvstendig avgjerd

Statssekretæren understrekar at departementet no gjer ein heilt sjølvstendig vurdering av Statnett sin søknad, og at dei mellom anna etterser at arbeidet NVE har gjort er i tråd med gjeldande lovar og reglar.

— Når har departementet ei avgjerd klar?

— Dette er ei viktig sak, og eg kan ikkje forskottere noko tidspunkt, seier ho.

— Nokon har tolka olje- og energiminister Terje Aasland dit at ei avgjerde kan kome allereie i august. Kan det skje?

— Det tør eg ikkje spekulere i. Men det er ei sak mange etterspør ei avgjerd om, difor er det viktig at det heller ikkje går for lang tid, seier Sæther.