Bondeorganisasjonane demonstrerte framfor Stortinget i vår.
Foto: Terje Pedersen / NTB / NPK
Staten seier ja til tilleggsforhandlingar med jordbruket
Det melde Landbruks- og matdepartementet torsdag kveld.
Jordbruket har fremja krav om tilleggsforhandlingar fordi høge prisar på gjødsel og andre varer et opp den forventa inntektsveksten til bøndene.
Staten og jordbruket vil ha dialog om vidare prosess.
Bondelaget sende krav til staten om tilleggsforhandlingar for to veker sidan, og fristen for å svare gjekk ut torsdag.
– Det er no to veker sidan vi sende krav om forhandlingar, og vi ventar på å komme i gang, sa leiar Bjørn Gimming i Norges Bondelag tidlegare torsdag.
– Kostnadene aukar og aukar, og mange skal no bestille gjødsel for neste sesong, sa Gimming.
Ifølgje Bondelaget vil kostnadene til gjødsel åleine ete opp to tredelar av den føresette inntektsveksten på 18.700 kroner per årsverk som er vedteken av Stortinget.
Norges Bondelag og Norsk Bonde- og Småbrukarlag ville ikkje forhandle med regjeringa om jordbruksoppgjeret i år, fordi dei meinte det var for stort sprik mellom kravet deira og regjeringstilbodet. Tilbodet vart dermed sendt til Stortinget, der det vart vedteke med støtte frå Framstegspartiet.
(NPK)
