Sosiale medium påverkar ikkje dei fleste unge negativt

Ny forsking viser at sosiale medium ikkje påverkar dei fleste unge negativt. Forskar Amanda Iselin Olesen Andersen ved Universitetet i Bergen tvilar på at strengare aldersgrenser er riktig medisin.

Andersen disputerte nyleg med doktorgradsavhandling om samanhengen mellom sosiale medium og psykisk helse, og fann at dei aller fleste ungdommane ikkje opplevde sosiale medium som stressande, skriv Framtida.no.

Forskinga kjem kort tid etter at regjeringa har foreslått ei absolutt aldersgrense på 15 år på sosiale medium. Høyringa har fått over 8000 svar. Andersen meiner mykje av debatten er påverka av frykt for nye medium og peikar på at sosiale medium har mange positive sider som ofte forsvinn i debatten.

– Nokre faktorar hang saman med stressopplevinga, men dei aller fleste ungdommane opplevde ikkje sosiale medium som stressande, seier Andersen til Framtida.no.

Forskaren meiner ei betre løysing er å ruste elevane gjennom opplæringa i skulen og stille plattformene til ansvar for at dei faktisk er alderstilpassa. Ho viser til at sosiale medium er ein viktig sosial arena for mange unge, der dei opprettheld kontakt med familie og vener, får støtte og kan utforska identiteten sin kreativt.

– Det er jo litt rart å tenkja seg ein automatisk vert utrusta til å navigera på sosiale medium når ein når ein viss alder.

(NPK)