Sommaridyll i landsbyen
Sommarens første sommarstreif svinga innom hjå Hogganvik landsby for å ta pulsen på kvardagslivet der ein vanleg torsdag.
Tunet i Hogganvik landsby ligg omkransa av frodig lauvskog, ein idyll med sjarmerande bygningar. Velstelte hagar med blømande rosebuskar og bøke allé ned mot Vindafjorden.
Det første som møter ein er eit livleg fuglekvitter utanfor Lars Hertervik huset. På ein benk i Iduna-tunet sit ein einsleg mann med caps og slappar av. Han helsar og fortel at han er i osteproduksjonen på den økologiske garden. Den upasteuriserte mjølka frå kyrne i fjøset blir nytta til osteproduksjon. Han heite Roy Victor Hansen seier han.
Annonse
— Bjarne er i fjøset. Det kom ein mann for å hente dei to kalvane. Dei er berre fjorten dagar gamle, seier Roy Victor.
Minuttar etterpå kjem ein bil med tilhengar og to små kalvar oppi. Dei er på veg til eit nytt tilvære på ein ny gard. Eit gløtt av sol og fin temperatur gjer det godt å sitte ute på det praktiske og fine tunet. Ein samlingsstad kvar føremiddag om vêret tillèt det.
— Eg er med og lagar ost måndag, onsdag og fredag. I dag vaskar eg alt utstyr i mjølkerommet. Osten er å få kjøpt i gardsbutikken vår, seier Roy Victor og smiler.
— Det blir mykje vasking når me lagar ost.
Annonse
Kortreist mjølk og hyllebærsaft
Etter kvart kjem Jocelyn Nelmida, husansvarleg i Anna Hansen huset, med kaffi og hyllebærsaft frå eigen produksjon, og ei flaske mjølk. Det er tid for ein pust i bakken og litt leskande. Bjarne Kvist Hansen kjem frå fjøset, med bordercollien ved si side. Det kjem fleire rundt borda. Alle har dei sine oppgåver på garden.
— Me måtte ringe politiet no i dag, for å varsle om at nokre stutkalvar har stukke av frå beitet. Med hovudvegen kloss ved kan det vere ein viss fare i trafikken, forklarer bonden på tunet, Bjarne Kvist Hansen.
Gardsbutikk
Veteranen og alt-mogleg arbeidsleiar, i bu -og arbeidsfellesskapet for vaksne som treng spesiell omsorg, Karin Keller, kom til Norge primært for å lære norsk for snart førti år sidan. Ho kvardagslivets oppgåver på garden svært godt.
— Målet vårt her er å skape eit meiningsfull liv for kvar enkelt. Det handlar om å bli sett for den ein er, og meistring av arbeidsoppgåver på garden, ved gartneriet og i skogsdrifta, i tillegg til vevstova og snikkarverkstaden. Gardsbutikken er ny og sel for det meste eigenproduserte produkt, forklarer Karin.
Annonse
— Dagen startar med morgonsamling. Hovudaktiviteten på denne årstida er drift i gartneriet og planting og luking i åkeren, smiler ho.
Før ystaren Roy Victor går ned og fortset vaskinga, kan han fortelje at interessene hans spenner seg frå song og musikk til teater, med roller som både Josef og engelen Gabriel.
— Eg likar å synge songar av Madonna, Neil Young, Abba og Dolly Parton, seier han.
