Snart klar med bok om spionmistanken
— Dette er ei framstilling av det som hende meg på 2010-talet og det som viste seg å vera ei stor geopolitisk verdshending. Bakgrunnen er at eg blei spurd av Norsk etterretning om å vera spion. Boka handlar om det som hende meg etter dette, seier Atle Berge på telefon frå Murmansk.
Bakgrunnen for Atle Berge sin unike historie som spionsikta går over 15 år tilbake i tid. På byrjinga av 2000-talet oppretta Ølen Betong ein betong og betongelement-fabrikk i Murmansk i Russland. På den tida var Berge eigar av betongkonsernet med hovudkontor i Ølensvåg og såg moglegheiter i å investera i nabolandet i aust.
Fabrikken stod ferdig i 2008. Berge var ansvarleg for drift og hadde av den grunn mange turar til byen på Kolahalvøya nordvest i Russland.
