Slit med rekruttering av nye rektorar
Over heile landet opplever både store og små kommunar utfordringar med få søkjarar til ledige stillingar som rektor i grunnskulen. I Vindafjord har talet på søkjarar variert frå éin til fem personar på ledige rektorjobbar dei siste åra, og i Etne kommune er det liknande forhold. Dei to kommunane har kvar to personar på sine lister til dei siste rektorjobbane ved høvesvis Vikedal og Enge skule. Ikkje uventa, meiner kommunalsjef Mona Rasmussen Sævik i Etne kommune.
— Me ser korleis det ligg an andre plasser, så dette er litt som forventa, men det hadde vore kjekt med fleire søkjarar. Me hadde tre søkjarar i første omgang og to nå, seier kommunalsjefen og synest det er uventa at så få har meldt seg.
— Me har ein stor flott skule med ei god leiing der me har tre gode avdelingsleiarar. Den nye rektoren vil få vera med på eit godt lag, på ein god skule. Eg har vore rektor sjølv og det er ein spennande jobb, seier ho.
