Skuffa over nye Renevo-eigarar

I juni 2021 lanserte dåverande Renevo-eigar Jan Kåre Pedersen planane for eit stort biogass-anlegg i Etne. På fremste rad under presentasjonen på Stord sat Etne-ordførar Mette Heidi Bergsvåg Ekrheim og dåverande klima- og miljøminister Sveinung Rotevatn (V) på fremste benk. Og optimismen rundt det som skulle bli ein av dei største investeringane knytt til industri i Etne nokon gong, på rundt 200 millionar kroner, var stor.

Droppar Etne

Men mindre enn tre år seinare er det altså som Grannar kunne melde allereie tysdag klart at Renevo droppar Etne. Selskapet har skifta eigarar to gonger. Først frå Jan Kåre Pedersen og hans med-investorar på Stord, til Gasnor som no har vidareselt til Infravia Capital Partners. Sistnemnde har nyleg stifta selskapet HeyGaz i Spania og HeyGaz Norway som si norske avdeling. Det er dette selskapet som ser ut til å vere ny hovudaksjonær i Biovind AS. Dei har ikkje svart på førespurnadar om intervju frå Grannar, men Biovind har invitert til eit pressemøte i Nerheim næringspark torsdag.

Dei nye eigarane går i staden inn i Biovind AS sitt planlagde biogass-prosjekt i Nerheim næringspark i Ølen. Etne-ordførar Mette Heidi Bergsvåg Ekrheim (Sp) seier at ho var vore kjend med at det har vore ein prosess mellom eigarane av Renevo og Biovind sidan november, og at ho i det same tidsrommet ikkje har lukkast å få Renevo i tale.

— Eg prøvde å både ringe og sende meldingar til dei. Men eg fekk ikkje svar før eg blei oppringt ein sein kveldstime for eit par veker sidan. Då blei det sagt at dei skulle ta kontakt om kort tid, men eg har ikkje høyrt noko ting, seier ho.

Ho seier at kommunen opplever mangelen på tilbakemeldingar frå Renevo som skuffande.

— Eg har ikkje hatt noko forventing om at oppkjøpsplanar skulle kommenterast overfor meg. Men å bli møtt med absolutt tausheit er skuffande. Eg hadde venta meir openheit og ei meir profesjonell haldning enn det dei har framvist, seier ho.

Ordføraren seier at kommunen har lagt ned arbeid i å få Renevo til å etablere seg i Etne.

— Det gjer me også i høve til andre aktørar. Men me er vande med at aktørarane takkar for hjelp, tilrettelegging og velvilje, og ikkje berre møter oss med tausheit slik Renevo gjer, seier ho.

Ho trekker fram at Renevo så seint som i august i fjor var på synfaring på Fikse, kor Etne kommune skal byggje ut eit større industriområde, og at dei då bad om både skisser og framdriftsplanar.

Ordføraren og mannen hennar er gardbrukarar, men er ikkje blant dei lokale bøndene som har hatt intensjonsavtale om levering av råvarer til biogassfabrikken. Men ho kjenner fleire andre som har skrive under på slike avtalar, og dei har heller ikkje høyrt noko frå Renevo. Det synest ho er arrogant overfor dei som sit med råstoffet, seier ho.

Trur på biogass

Bergsvåg Ekrheim legg til at ho personleg har klokkartru på biogass som konsept, og at Etne Senterparti alt i partiprogrammet i 2019 hadde eit punkt om at dei ynskte ei slik etablering i Etne.

— Framtida vil vise at vi treng ein energimiks med både biogass, hydrogen, ammoniakk, sol, vind og vasskraft, seier ho.

I kva grad ho trur det vil vere plass til ein annan biogassaktør om det no blir ei etablering av ein biogassaktør i Ølen vil ho ikkje uttale seg om.

— Det har eg ikkje nok kunnskap om, seier ho.

Men ho er klar på at den ledige tomta på Tongane gir moglegheiter for mange andre som måtte ynskje å etablere næring der.

— Vi ligg jo midt i Sunnhordland-bassenget, med alle moglegheitene det gir, seier ho.

Grannar har har prøvd å få Frank Nordmo, som er dagleg leiar i både Renevo og HeyGaz Norway AS, utan hell.

Bondemøte i Etne

Biovind/HeyGaz har invitert bøndene i Etne til eit eige møte torsdag kveld, kor dei også inviterer bøndene til å bli medeigarar i selskapet som planlegg biogassfabrikk i Ølen.