SKL etablerer hydrogenselskap

Gjennom det nyoppretta selskapa har dei to partane ein ambisjon om å bli totalleverandør innan grøn hydrogen med fokus på maritim sektor i første omgang. Hydrogen Solutions AS som nå er under registrering i Brønnøysundregistrene, får Kvinnherad, men planane er å sjå på lokal produksjon ved fleire lokasjonar.

Dagleg leiar i HYDS, Thor Henrik W. Hagen seier det er mykje spennande som nå skjer på hydrogen-fronten og at dei har lyst til å vera med på denne utviklinga. Han jobbar til dagleg som forretningsutviklar i SKL.

— HYDS vil tilby skalerbare løysingar som er spesielt godt eigna for lokal produksjon, noko som også vil gi lokal verdiskaping. Blant anna vurderer me å utnytta ressursane i Fjæra der SKL er i gang med kraftutbygging gjennom Håfoss Kraftverk AS, så det ligg an til å skje mykje spennande i Åkrafjorden-området i denne samanhengen, seier Hagen til Grannar.

Han konstaterer at det trengst finansiell soliditet, gjennomføringsevne og kunnskap frå heile verdikjeda for å lukkast. Når det gjeld Fjæra som aktuell produksjonsstad er denne også interessant i forhold til transportbransjen med sin nærleik til E134.

Peika på Fjæra

Fjæra med kraft og europavegen tett på har også tidlegare vore peika på som interessant for hydrogenroduksjon. For to år sidan fortalde Grannar om ein Sintef-studie som viste at det kan vera lønsamt å utnytta krafta frå Rullestad til produksjon av både hydrogen og oksygen. Det er opp til marknaden og dei som sit med konsesjon i området å utnytta ressursen, uttalte prosjektleiar Erlend Støle Hansen i NVE den gongen.

Og nå kan det bli fortgang i denne type produksjon i regionen. Toppsjef i SKL, John Martin Mjånes, ser på etableringa av Hydrogen Solutions AS som eit viktig og rett steg for dei som produsent av fornybar energi, med fokus på vasskraft.

— Ved å etablera eit reint hydrogenselskap kan me spissa og vidareutvikla satsinga me har gjort innanfor dette over fleire år. Når me nå vel å reindyrka hydrogensatsinga vår, får me ein unik sjanse til å vidareforedla vår grøne kraft, seier Mjånes.

— Offensiv region

Liquiline har over tid etablert eit svært godt samarbeid med SKL, og har alt fleire felles prosjekt med den store kraftprodusenten i Sunnhordaland som er tungt inne i Etne kommune.

— Det er ekstra kjekt å få til ei hydrogensatsing i Sunnhordland saman med SKL. Både fordi regionen er offensiv i forhold til potensialet som ligg i hydrogen, og har sterke fagmiljø som NCE Martime CleanTech og katapultsenteret Sustainable Energy, seier Knut Førland, dagleg leiar i Liquiline.

HYDS sin tanke er å utvikla, bygga, eiga og drifta fleire anlegg for produksjon av grøn hydrogen. Selskapet vil kombinere Liquiline si mangeårige erfaring med lagring av flytande gass og SKL si erfaring med utbygging av kompleks infrastruktur og kraftkompetanse.

— Me vil nytta kommersielt tilgjengeleg og utprøvd teknologi til å levera nøkkelferdige løysingar. Selskapet jobbar samtidig med teknologisk vidareutvikling saman med avtalepartnarar. Me meiner at Hydrogen Solutions kan bidra til å gjera hydrogen til eit reelt nullsleppsalternativ i Noreg, seier Førland.

Første leveranse i 2022

Thor Henrik W. Hagen trur det å kjenna energimarknaden, både knytt til nett og straumpris, vil vera ein fordel i marknaden, samstundes som dei også har god kunnskap frå elektrolyse til dispensing, drift og vedlikehald.

Hydrogen Solutions kan saman med sine eigarar og samarbeidspartnarar visa til fleire referanseprosjekt, og innehar brei prosjektkompetanse. Det nye selskapet står i ein oppstartsfase med fleire spennande prosjekt, og har blant anna nyleg signert ein intensjonsavtale på leveranse av grøn hydrogen innan 2022 med eit stort vekstpotensial.