Mange meiner at vaksineringa går for tregt.
Foto: Ole Berg-Rusten / NTB
Skepsis til vaksinasjonstempoet
NPK-NTB: Tilliten nordmenn har til tempoet i vaksinasjonen har auka, men framleis har ikkje meir enn 36 prosent lit til at tempoet på vaksinasjonen i Noreg er effektivt.
38 prosent svarer nei, medan resten veit ikkje, ifølgje Norsk koronamonitor frå Opinion, som har spurt 3.000 personar.
Sjølv om ikkje fleire har tillit til at tempoet på vaksinasjonen i Noreg er effektivt, er det likevel ein auke med 2 prosentpoeng sidan tilsvarande måling for to veker sidan.
— Tilliten til tempoet i vaksinasjonen har auka, men langt ifrå mykje. Folk blir truleg meir opptekne av tempoet dersom det blir kamp mot klokka med mutert villsmitte i gatene, seier seniorrådgivar Nora Clausen i Opinion.
Status vaksinering
76.859 personar er vaksinerte med første dose av koronavaksinen i Noreg, viser FHIs statistikk måndag. 1.887 personar har så langt fått andre dose.
Dermed er 4.888 fleire nordmenn registrerte å ha fått første dose enn fredag. 14 fleire er registrerte vaksinerte med dose to.
Flest har fått første dose i Viken (15.834), Oslo (11.848) og Vestland (8.602). Færrast dosar er sette i Troms og Finnmark (3.593), Møre og Romsdal (3.956) og Agder (3.989).
I fylka Viken (863), Innlandet (602), Oslo (407) og Finnmark (1) har personar fått dose to.
Den første koronavaksinen i Noreg vart sett den 27. desember og var produsert av Pfizer og Biontech. 15. januar vart den første dosen av Moderna-vaksinen sett.
