Skapar ein heim saman

— Me vil finne vår stil saman. Gjennom oppussinga får eg litt eigarskap til huset, seier Herborg Helland.

Huset ligg nær Enge bru og har kort avstand til Etne sentrum. Det blei bygd i 1975. Mens dei pussar opp vekslar Willy Asbjørn Lunde og Herborg Helland mellom å bu i huset og på hytta som ligg på Skjersvik i Etne.

Omfattande

Når ein kjem på besøk til Lunde og Helland er det ingen tvil om at det er eit stort prosjekt på gang. Det er stillas rundt heile huset og i hagen er det eit telt til snikkarane med materialar.

— Sist huset blei pussa opp var for 15 år sidan. Nå pussar me opp alt unntatt kjøkken og stova i 1. etasje, fortel Lunde.

Kjøkkenet held framleis nokså moderne standard. At det står urørt gjer at huset fungerer til praktiske formål under oppussingsprosessen, sjølv om den er svært merkbar både inne og ute. Lunde og Helland begynte å rive i juli og legg ned mykje innsats i dette.

— Me riv alt sjølv, samt at me tek oss av rydding og køyring av boss, seier Lunde.

Betre luft

Dei siste fem vekene før Grannar tek turen har snikrar frå Berge Byggservice jobba på huset. Oliver Vestbø i Vestbø Inneklima har stått for ventilasjon, prosjektering og utføring.

— Me er veldig fornøgde med snikkarane og ventilasjonsfirmaet, seier Lunde og Helland.

Lunde opplyser at dei ikkje har sett nokon dato på når dei skal vere ferdige med oppussinga, men berre bestemt kva dei skal gjere. Den lista er lang og ein del er allereie gjort.

— Me har skifta bordkledning på heile huset, og alle vindauge og dører. I tillegg har me etterisolert ytterveggar og tak, samt skaffa eit balansert ventilasjonsanlegg, fortel Lunde.

Han forklarar at det har blitt ti centimeter ekstra med isolasjon på ytterveggane. Det balanserte ventilasjonsanlegget er for å få betre luft, sidan huset blir tettare når ein isolerer så mykje som dei gjer.

Utsikt og kos

Totalt har paret fått inn fem nye dører og 35 vindauge. Vindauga på veggen er utskiftingar, mens takvindauga er heilt nye. Dei nye vindauga er trelagsvindauge og tjukkare enn dei som var i huset før.

— Desse vindauga har mykje betre U-verdi, noko som betyr mindre varmetap, seier Lunde.

Dei nye vindauga er større enn dei som var der tidlegare. Med det kjem det inn litt meir lys, som saman med den auka varmen gjer at Lunde synest det blir eit lunare hus. Han får støtte frå Helland, som nyt utsikten frå stova og ut på Etneelva.

— Det gir god estetikk å få inn naturen og elva gjennom vindauga. Eg er veldig glad i naturen og fascinert av den flotte elva. Frå heimbygda mi Ølen er eg vant med sjøutsikt, men utsikt over elva er like bra, meiner Helland.

Dei har tatt ut ei 25 år gammal varmepumpe som dei skal erstatte med ei ny. I tillegg skal dei ha inn ein vedomn.

— Vedomnen er litt for kos og stemning, fortel Helland.

Tid for noko nytt

Med betre isolasjon og nye vindauge og varmepumpe blir huset med ein gong mykje meir energieffektivt. Lunde har ikkje rekna på kva tiltaka vil ha å seie for straumrekninga, men trur det blir ein del mindre å betale.

Lunde og Helland er glade for mindre straumbruk, men det er ikkje hovudgrunnen til at dei pussar opp. Lysta på ein forandring var ei større drivkraft.

— Oppussinga var ikkje akutt nødvendig, men det var tid for ein ny stil. Me ville ha noko litt moderne, så vel som eit varmare hus, seier Lunde.