Skadeverk på bil med hamar

Klokka 22.14 laurdag melder Sør-vest politidistrikt på politiloggen at dei fekk melding klokka 16.22 om at det har vore utøvd skadeverk på ein bil med ein hamar i Ølensvåg.

— Det var vitnar på plassen som meldte og beskreiv ein vaksen som mann som slår med hamar på bil, seier Dan Magne Gaard som er vaktsjef på Haugesund politistasjon.

Ifølgje Gaard blir det bestemt at dei skal stilla med væpna politi sidan hamar kan bli slagvåpen.

— Ved væpna politi stiller ein alltid sterkare enn normalt, seier Gaard.

Det er ikkje alltid det er nok patruljar, slik at då treng Etne og Vindafjord politistasjon assistanse frå Haugesund politistasjon. Patruljen som skulle rykka ut frå Haugesund kolliderte med ein personbil på Raglamyr, og blei forhindra frå å koma. Derfor kom politiet frå Haugesund til staden først klokka 20.00.

— Den første patruljen på staden observerer, passer på og ventar til ny patrulje kjem, seier Gaard.

Arrestert

Gjerningspersonen er inne i ei leilegheit medan den første patruljen er på staden. Då patruljen frå Haugesund kjem, er ikkje gjerningspersonen villig til å koma ut. Hovudregelen til politiet er at gjerningspersonen skal koma ut til politiet.

— Det blir kommunisert og han blir overtalt til å koma ut. Han blir lagt i handjern og pågripe klokka 21, seier Gaard.

Mannen i 40 åra blir køyrd til Haugesund og innsett i arrest. Han er meldt for skadeverk og truslar.

— Det er ein relasjon mellom gjerningsperson og bileigar, seier Gaard.