Sjukdomsutbrot hos laksefisk i trønderske elvar

I haust har det vorte registrert fleire utbrot av sjukdommen saprolegniose hos laksefisk i elvar i Trøndelag.

– Vi ser at utbrota kan ha samanheng med låg vassføring og uvanleg høge temperaturar, seier Åse Helen Garseth, som er fagansvarleg for villfisk ved Veterinærinstituttet, i ei pressemelding.

Den 17. september varsla Gaula Elveeigarlag Veterinærinstituttet om sjuk fisk i Gaula. Det vart observert gytefisk av både laks og aure med teikn til saprolegniose i sideelva Sokna ved Støren.