Sjå kva som skjer komande kulturveke
Kulturveka i Etne og Vindafjord byr på alt frå broderi og marknadsdag til konsertar, gudstenester og idrett.
Her er oversikta, basert på
Det skjer i Grannar-distriktet».Laurdag 20. september er det klart for årets Bondemarknad i Ølen. Då fyllest Sjoargata med rundt 30 boder med lokale produkt, utstillingar og aktivitetar. Born kan gle seg til å hoppa i høyet, kaste poteter, helsa på dyr og prøva seg på saging. For vaksne ventar både maskinutstilling og den tradisjonsrike tvekampen mellom bønder. Bygdekvinnelaget stiller med grillmat og lappekaker. – Me køyrer same linja som tidlegare, og vil visa fram mangfaldet i bygda, seier dagleg leiar i Vindafjordbonden, Eivind Lien.
Annonse
Kultursting
Torsdag startar eit nytt tilbod på Vindafjord bibliotek, som har fått namnet kultursting. Det er eit broderiprosjektet som Guri Ravatn har sett i gang saman med bibliotekar Vanja Sandøy. Her kan alle møtast – uansett erfaring – for å brodera, dela mønster og få inspirasjon. Materiell er tilgjengeleg på biblioteket, og både Ravatn og tilsette står klare til å rettleia. Treffet blir fast ein gong i månaden, og målet er å skapa ein inkluderande møteplass på tvers av kulturar.
Meir på programmet
Programmet resten av veka er rikt og variert. Torsdag 18. september startar biblioteket dagen med språktreff, før ungdomsrådet samlast til møte på ettermiddagen. Fredagen blir det musikk på Vindafjord bibliotek når Magne Skjævesland skal ha konsert.
Annonse
Helga byr i tillegg på fleire arrangement. Laurdag inviterer Mibau Stema til open dag både i Ølen og på Jelsa, medan Nesheimstunet har besøk av Trio de Grimo. Om kvelden er det klart for konsert med Maria Toresen & A Band i Sandeid samfunnshus. Søndagen rommar tradisjonelle gudstenester i Vikedal, Vats og Etne, og på kvelden blir det møte på Kyrkjetunet i Ølen med Inge Morten Paulsen frå Normisjon.
Den nye veka startar med Sjoarakademiet med Arnt Stefansen, seniorgaming og digihjelp på biblioteket, i tillegg til strikkekafé i Etne og fotballkamp mellom Ølen og Bremnes 2. Tysdag blir det orienteringsløp i Ølen sentrum, og samtidig går fristen ut for å melda seg på Eldredagen. Onsdag rundar programmet av med høgtlesing for barn på biblioteket, påmelding til fagdag i Vikedal i regi av Skogselskapet, og eit ekstraordinært årsmøte i Ølen Vassverk.
