Ola Skipevåg er tilsett som berekraftsleiar i Berge Sag. Han skal lage ein stor rapport om heile verdikjeda i produksjonen deira.
Foto: Svein-Erik Larsen
Bygg og bu
Satsar på berekraft
Vikedalsbuen Ola Skipevåg (32) har blitt tilsett som berekraftsleiar i Berge Sag. Han ser fram til å ta fatt på eit svært omfattande arbeid med å kartlegge heile verdikjeda deira.
— Eg er glad i nye utfordringar, og dette er ein stor ein, seier Ola Skipevåg.
Sidan 2020 har han jobba i XL-BYGG Berge Sag, der han framleis vil ha ein stilling. Vikedalsbuen gjekk studiespesialisering på Ølen vidaregåande skule før han begynte på transport og logistikk, og så blei lærling som yrkessjåfør.
Etter å ha køyrd nokre år gjekk ferda vidare til Berge Sag, der har han teke fleire utdanningsløp ved sidan av jobben. Han starta tidleg på ein bachelorgrad i administrasjon og leiing som han skal levere i mai. Gjennom Universitetet i Stavanger har han tatt kurs i HMS-leiing og på fagskulen i Stavanger tok han fag om HMS-kvalitet og -prosjektleiing. I tillegg har han sikra seg eit fagbrev i logistikk.
