Samfunn tek betre vare på eldre menn enn eldre kvinner

Verda er langt frå likestilt, og kjønnsforskjellar i ulike samfunn gjer at menn blir favorisert framfor kvinner òg i alderdommen, blir det konkludert med i ein internasjonal analyse publisert i The Lancet Healthy Longevity journal.

Analysen er den første i sitt slag som undersøkjer kjønnsforskjellar mellom eldre i 18 land i Organisasjonen for økonomisk samarbeid og utvikling (OECD).

Noreg kjem relativt sett godt ut av det, samanlikna med dei andre landa i undersøkinga, men også her er det ein jobb som må gjerast. Det forskarane bekymrar seg mest for, er at befolkninga i verda blir stadig eldre, og at forventa levetid for kvinner framleis i snitt er 3,3 år høgare enn for menn.