Sal og bruk av fyrverkeri
Nyttårsaftan nærmar seg, og i løpet av dei neste dagane kjem folk i Noreg til å handla nyttårsrakettar for titals millionar kroner. Viktige reglar for sal og bruk er ein nøydd til å vera klar over.
Dagane frå 27. desember til 31.desember er dei einaste dagane alle over 18 år kan kjøpa og bruka fyrverkeri. I dette tidsrommet brukar norske fyrverkerientusiastar mangfaldige millionar kroner. I fjor selde Svea, som er Nordens største leverandør av fyrverkeri, for nesten 59,9 millionar kroner, berre i Noreg ifølgje Finansavisen. Det nye året ser også ut til å starta på spektakulært vis, for det har vore ein markant oppgang på import av fyrverkeri, ifølgje Statistisk sentralbyrå. I år er det importert 1.027 tonn fyrverkeri, og det er ein oppgang på heile 62,5 prosent, trass i at det har blitt 24,3 prosent dyrare å importera sidan i fjor.
Utsalsstader
Annonse
Det er kommunen, som regel brannvesenet som gir løyve til handel med fyrverkeri, og søknaden må vera kommunen i hende innan 1. mai kvart år. I år kan etnebuar og vindafjordingar handla fyrverkeri hos Auto Pluss Tollaksen, Hundseid varmepumper og Instruo i Sandeid, hos Europris i Ølensvåg, Hageland i Ølen, og i Etne har dei utsalsstad hos Sport 1, Bondekompaniet, Europris og Etne Auto.
— Nytt i år er at ingen frå Skånevik har søkt om å få selja fyrverkeri. Det betyr at skåneviksbuen er nøydd for å reisa til Etne for å handla, seier Audun Matre, Haugaland brann- og redning.
Bruk av fyrverkeri
Det er viktig å vera pliktoppfyllande når det kjem til regelverk rundt fyrverkeri. Privatpersonar har berre lov til å fyra opp frå klokka 18.00 til 02.00 på nyttårsaftan, og det er ikkje lov til fyra opp i byggefelt der husa står tett, i nærleik av skog eller andre brannfarlege omgjevnader. Ein må også vera fylt 18 år, for å kunne kjøpa fyrverkeri.
