Røldalstunnelen inne på statsbudsjettet

— Det er heilt fantastisk! Dette har me venta lenge på, seier Vindafjord-ordførar Ole Johan Vierdal (Sp).

Han får støtte av Wenche S. Lilleland i Vindafjord Ap og Etne-ordførar Mette Heidi Bergsvåg Ekrheim (Sp). Dei og Ness Klungland er alle tydelege på at dette er eit svært viktig prosjekt for regionen. Prosjektet har ei kostnadsramme på 4,9 milliardar kroner.

— Midlane blir fordelt over byggeperioden, fortel Pollestad.

Statens Vegvesen sin omtale av prosjektet opplyser at parsellen E134 Røldal–Seljestad gir ei innkorting av køyrelengda på 6,4 kilometer og redusert reisetid på sirka 18 minutt for tyngre køyretøy, og 12 minutt for personbilar. Den nye Røldalstunnelen under Røldalsfjellet utgjer størstedelen av parsellen. Ny Røldalstunnel blir cirka 13 kilometer lang, og skal erstatte dagens Røldalstunnel, Seljestadtunnelen og dei tunge stigningane i Håradalen.

Avsløringa blei feira med kake på rådhuset i Ølen.

Lokalt engasjement

Det skapte sterke reaksjonar då prosjektet, som ligg som nummer to på prioriteringslista til Statens vegvesen, ikkje fekk oppstartsmidlar på førre statsbudsjett. I april var Vierdal og Bergsvåg Ekrheim, med i bil- og trailerkolonna frå Seljestad i vest til Liamyrane i aust, for ny Røldalstunnel.

Derfor var det ein stor dag for dei på tysdag.

— Dette har enorm betydning for næringslivet på både Aust- og Vestlandet, seier Bergsvåg Ekrheim, som også er styremedlem i E134 Haukelivegen AS.

Pollestad er glad for at dei har høve til å få prosjektet med nå. Konfrontert med tidspunktet, og om dette er meint for å gi dei lokale ordførarane ei hjelpande hand i valkampen, vel ministeren å rose sine partikollegaer.

— Ordførarane har gjort ein god jobb med å løfte prosjektet, meiner Pollestad.

Sjølv opplev ordførarane ofte at folk tar kontakt om forskjellege prosjekt på E134. Det kan vere på stand eller på utflukter som til dømes då dei var med politiet på ein promillekontroll på Fikse.

— Det er godhjarta. Folk viser at dei engasjerer seg og at det har stor betyding for dei, fortel Vierdal.

Nøgd Halleland

Også i Frp skapar nyheita begeistring. Stortingsrepresentant, Terje Halleland, begynte å bli nervøs for at prosjektet heller ikkje i år skulle vere inne på statsbudsjettet, og gler seg stort over at den er det.

— Røldalstunnelen er svært samfunnsøkonomisk, gjennom sparte drivstoff- og vedlikehaldskostnadar, miljøutslepp og ikkje minst ein sikrare arbeidsplass, seier Halleland.

Halleland meiner at den nye Røldalstunnelen gjer at E134 blir ein enda viktigare trasé mellom aust og vest, og kan sikre at Bakka-Solheim får ein trygg plassering på den neste Nasjonale transportplan (NTP).

Håpar på Bakka-Solheim

Som stortingsrepresentant har Ness Klungland blitt kontakta om E134-prosjekt nesten vesentleg. Sjølv er ho like hyppig i forskjellege aktørarar i Samferdselsdepartementet.

— Målet mitt har vore at folk i departementet skal tenke E134 når dei ser meg, fortel Ness Klungland.

Både ho og Vierdal håpar at Røldalstunnelen kan bidra til at Bakka-Solheim på sikt kan bli realisert. Vierdal ser også Rogfast, den planlagde armen mellom Odda og Bergen og den følgjande auka trafikken som noko som vil vere med å presse fram prosjektet.

— Me bør få regulert heile strekket og så kan ein bygge trinnvis. Det er viktig med ein heilskapleg plan, seier Vierdal.

Han ser positivt på ideen om å sette i gang med Bakka-Mo, slik statssekretær i Tom Kalsås (Ap) i Samferdselsdepartemente og fleire andre tok til orde for under vegmøtet på Skakke i Etne sist veke. Vierdal understrekar og viktigheita av at ein på sikt sikrar at vegen ikkje går gjennom sentrumi Etne, Ølen og Ølensvåg.