Biogass
Renevo-eigar tek styringa i Biovind
Det nystarta spanske bioenergi-selskapet HeyGaz har kjøpt fleirtalet av aksjane i Vindafjord-selskapet Biovind AS. Bak står dei same eigarane som i fjor tok over Renevo AS, som har hatt store investeringsplanar i Etne.
Biovind AS har invitert pressa til eit møte på Nerheim næringspark i Ølen komande torsdag. Dette i høve presentasjonen av ny eigarstruktur i Biovind AS og planane om oppretting av ein biogassfabrikk i Ølen. Selskapet ønskte ikkje å fortelje meir om saka måndag, men viser til pressemøtet som skal finne stad torsdag, der også ordførar i Vindafjord, Ole Johan Vierdal (Sp), etter planen skal vere til stades.
Spansk inntog
Annonse
Men Grannar kan alt no avsløre at det er det nyoppretta spanske selskapet HeyGaz som tek styringa i Biovind AS. Dette går fram av ei melding som eigaren av HeyGaz, InfraVia Capital, publiserte på si nettside allereie den 4. mars. InfraVia Capital er det same selskapet som nyleg kjøpte Renevo AS, inkludert dotterselskapet Renevo Etne AS frå Gasnor AS. Sistnemnde kjøpte i si tid Renevo-aksjane av Renevo-gründer Jan Kåre Pedersen. Renevo har som kjent hatt store oppstartsproblem med sitt første anlegg på Eldøyane på Stord, der dei no planlegg å skifte ut teknologien som dei har brukt fram til no.
Etter det Grannar forstår, blir Infravia Capital hovudaksjonær i Biovind AS og får dermed full kontroll over utviklinga av det nye HeyGaz Norway AS, medan ein mindre eigardel skal vere på norske hender. Etter det Grannar forstår, skal slakteri-gigantane Fatland AS og Nortura AS framleis eige delar av det rekonstruerte Biovind-selskapet. Det tyder på at grunnleggjaren av Biovind, Rune Furseth frå Sandeid, og partnaren Kjell Thomas Kirketeig enten sel seg heilt ut eller reduserer eigardelane sine i selskapet kraftig. Furseth har til no vore hovudaksjonær med nesten 58 prosent av aksjane i Biovind AS, Kirketeig med cirka 18 prosent. Lokale bønder i Vindafjord har gjennom selskapet Biobonden AS eigd 10 prosent av Biovind AS. I kva grad namnet Biovind blir ståande, er enno ikkje kjent.
Selskapet HeyGaz Norway AS vart stifta den 1. februar og registrert i Brønnøysundregistra så seint som sist torsdag. Selskapet er registrert med Frank Nordmo frå Stavanger som dagleg leiar. Denne personen er òg dagleg leiar i Renevo AS. Grannar har måndag kveld prøvd å kontakte både Frank Nordmo og Rune Furseth utan å lukkast.
Ein tidlegare toppleiar i den spanske energigiganten Repsol, Francisco Maza, er tilsett som administrerande direktør i HeyGaz i Spania, og er registrert som styremedlem i HeyGaz Norway AS. Fernando Sarasola, ein partnar i InfraVia, er styreleiar i det norske selskapet.
Annonse
Ifølgje meldinga InfraVia Capital har publisert, har HeyGaz ambisjonar om å byggje ut fleire biogassanlegg over heile Europa. Dei har allereie aktivitetar i Portugal og Hellas og vurderer investeringar i Nederland og Italia i tillegg til i Nord-Europa.
Ølen framfor Etne?
Etter det Grannar forstår, er det eit ope spørsmål om det i det heile tatt vil bli bygd eit biogass-anlegg i Etne. Heilt sidan grunnleggjaren av Renevo, Jan Kåre Pedersen starta selskapet, har det vore ein konkurranse om å sikre seg lokale råvarer frå bøndene i Grannar-distriktet, sidan det truleg ikkje ville vore nok til å drive to biogassfabrikkar i området.
No ser det likevel ut til at Vindafjord og Nerheim næringspark kan ha sikra seg eit forsprang i konkurransen om å etablere biogassindustri.
Dette er fabrikken Renevo har hatt planar om å byggje på Tongane i Etne.
ILLUSTRASJON: RENEVO
