Rekordmange søknader til Kyrkjebevaringsfondet

Kyrkjebevaringsfondet har fått inn 374 søknader om støtte til ulike kyrkjeoppussingar.

For 2026 var det mogleg å søkje på fleire typar tilskot hos Kirkebevaringsfondet: Istandsetjing, kompetansetiltak, og dessutan tiltak som aukar oppleving, engasjement, formidling og deltaking. I forslaget til statsbudsjettet ligg det inne 400 millionar for 2026. Dette er tredje året kyrkjer har høve til å søke om midlar gjennom fondet.

– Dette viser at moglegheita til å få tilskot byrjar å bli godt kjent i Kyrkje-Noreg, seier Oddbjørn Eide, dagleg leiar av Kirkebevaringsfondet, i ei pressemelding.

Det er forprosjekt og hovudprosjekt innanfor istandsetjing som har øvste prioritet når sekretariatet skal prioritere mellom søknadene, men Eide lovar tildelingar innanfor alle tilskotsordningane:

– Det er første gong vi har lyst ut innan ordningane for oppleving, engasjement, formidling og deltaking, og derfor er vi ekstra spent på desse søknadene. For istandsetjing og kompetanse ser vi at talet på søknader har auka kvart år.

(NPK)