Pussar opp både inne og ute

Den eldste delen av Ølen vgs er i ferd med å få seg eit etterlengta ansiktsløft. Innvendig er nytt kantinekjøkken på plass. Sitjearealet knytt til kantina er også i ferd med å bli pussa opp, og ved inngangspartiet er fleire klasserom bygde om til eit stort og romsleg mediatek. Tre nye grupperom er under oppføring og den eldste bygningsdelen har fått direkte gjennomgang til nybygget via eit nytt inngangsparti. Det innvendige arbeidet er venta å står ferdig om kort tid, og når oppgraderinga innvendig er ferdig står den utvendige fasaden for tur.

Nye plater skal erstatta murpussen som er i ferd med å smuldra opp enkelte stader, og heile taket på den fylkeskommunale skulen skal skiftast. Går alt etter planen skal arbeidet vera unnagjort i løpet av halvanna år.

— Me er glad for at det blir satsa på skulen, seier rektor Ruth Sæle.