Fleire har vendt seg til politiet etter at dei fekk SMS som gir seg ut for å vere frå namsfut eller namsmann.
Foto: Emilie Holtet / NTB
Politiet åtvarar mot svindlarar som gir seg ut for å vere frå namsfuten
Fleire har vendt seg til politiet etter at dei fekk SMS som gir seg ut for å vere frå namsfut eller namsmann. Dette er svindel, åtvarar dei.
– Meldinga viser til ei påstått sak som må betalast snarleg for å unngå gebyr. Betaling kan gjerast ved å klikke på ei lenke og oppgi sin BankID. Det er også meldt om eit tilfelle der nokon har fått ein telefon frå ein person som gir seg ut for å vere namsfut, og som ber vedkommande betale inn eit gitt beløp på konto, skriv Politidirektoratet i ei pressemelding.
Begge delar er forsøk på svindel, understrekar dei. Politiet rår folk til ikkje å klikke på lenka, svare eller betale til konto via telefonen.
Svindelforsøka blir stadig meir avanserte, og politiet åtvarar derfor folk om å vise aktsemd.
– Ein generell regel er å ikkje oppgi BankID, passord eller andre sensitive personopplysningar per telefon eller via lenke i SMS, skriv Politidirektoratet.
(NPK)
