Pengane til E134-prosjekt er sikra
Torsdag vedtok Stortinget utbygging og finansieringa av E134 Røldal-Seljestad. Vedtaket med ei ramme på 4,921 milliardar kroner blei feira med kake.
— Det er veldig bra for heile Haugalandet at dette nå kjem på plass. Nå står ingenting i vegen for at arbeidet kan starte. Mange har gjort ein strålande jobb for å få denne tunellen på plass, og det blei velfortent feira med kaka på Stortinget i dag, sa stortingsrepresentant Lisa Marie Ness Klungland (Sp) kort tid etter vedtaket
Tryggleik, tid og miljø
Ness Klungland var blant dei som heldt innlegg under stortingsdebatten. På talarstolen minnast ho enorm lette og glede då nyheita om at det endeleg skal komme ein ny Røldalstunnel blei kjent i august i fjor.
Annonse
— Heile vinteren står det fast trailerar som ikkje kjem seg opp eller det ligg trailerar i grøfta som ikkje har klart svingane, sa ølensbuen Ness Klungland, og poengterte for Stortinget at vegen er svært viktig for hennar heimregion.
Ho uttala at vegen har enorm betyding for næringslivet på både Aust- og Vestlandet. Dette ikkje berre grunna utfordringane med å komme seg over, men også fordi det er tidssparande, kostnadssparande og meir miljøvenleg. Med å vise til eit tilfelle i vinter der ferjer var innstilte og fjellovergangar stengte, poengterte ho at det også er eit beredskapsomsyn å ta i saka.
Vidare omtala Ness Klungland Røldal-Seljestad-prosjektet som første steg på Seljestad-Vågslid og understreka at det er viktig at framdrifta på resten av strekket held fram.
— I går stod folk i kolonne og venta i opp mot tre timar til saman, sa ølensbuen og poengterte at tid er pengar.
Annonse
Til slutt takka ho alle som har stått på og har engasjert seg i saka. Spesielt trekte ho fram ordførarar og partikollegaer Ole Johan Vierdal (Vindafjord) og Mette Heidi Bergsvåg Ekrheim (Etne).
Ikkje i mål, men i gang
Også Tove Elise Madland (Ap) frå Vindafjord deltok i debatten. Ho understreka betydinga av vegen i eit bedriftsøkonomisk, samfunnsøkonomisk- og klimaperspektiv.
— E134 er vår veg aust-vest. Det er ein stor dag for heile regionen, sa Madland.
For næringslivet er det ifølgje Madland heilt avgjerande at vegen kjem. Ho eksemplifiserte med heimkommunen Vindafjord, kor det produserast store mengder mat som blir sendt med lastebil austover kvar einaste dag.
— For våre yrkessjåførar vil dette bety ein betre arbeidskvardag, sa Ap-politikaren.
Annonse
Ho understreka at dei ikkje er i mål, og at mykje står att før dei har ein vintersikker veg, men at dei nå er i gang.
I vedtaket slutta Stortinget seg til delvis bompengefinansiering av prosjektet E134 Røldal-Seljestad. Mange lokale politikarar og yrkessjåførar har engasjert seg for dette og andre prosjekt på E134 over fleire år. Nyleg blei det kjent at strekninga mellom Bakka og Mo i Etne er inne i regjeringa sitt forslag til kommande nasjonal transportplan (NTP) for 2025-2036, med ei kostnadsramme på 2,4 milliardar.
