På tur for betre helse

— Eg blir 50 år den 16. juni. Då skal eg ha nådd alle dei 89 toppane i Vindafjord, seier Kåre Vignes.

Den store interessa for turgåing starta for eit par år sidan. Ein helsesjekk viste eit faretruande høgt blodsukker og ei kroppsvekt som helst burde vore lågare.

— Eg visste at eg var feit, men ikkje at eg hadde høgt blodsukker. I mai 2023 fekk eg vita at eg hadde diabetes 2. Eg fekk tilbod om medisin og at eg burde kunne gå ned i vekt. Eg hadde helst lyst til å sleppa medisinar, så eg fekk råd om kosthald og starta å gå tur kvar dag, seier den turglade 49-åringen som kutta ut juicedrikking, minka ned på brusinntaket og heldt seg unna snopeskåla.