— Det dukkar stadig opp unge talent, i både dal og by, som brukar språket på ein sterk og innovativ måte. Det vera seg i musikk, idrett, politikk eller litteratur. Det handlar om ungt blod, nye tankar og sterk gnist. Det er ei kåring som er til for å skapa merksemd rundt Noregs vakraste språk, seier musikar og juryleiar Daniel Kvammen i ei pressemelding.
Kåringa er eit initiativ frå Nynorsk kultursentrum, som har fått med seg Daniel Kvammen, Norsk Målungdom og Framtida.no.
Juryen er i tillegg til Kvammen, leiar i Norsk Målungdom, Gunnhild Skjold, direktør i Nynorsk Kultursentrum, Per Magnus Finnanger Sandsmark og nyheitsleiar i Framtida.no, Andrea Rygg Nøttveit.
Juryen skal finna nynorske talent innan musikk, litteratur, kultur og scene, forsking og utdanning, sosiale medium, idrett, politikk, næringsliv, og organisasjonsliv. Personane må vera 26 år eller yngre og på ein eller anna måte markera seg med nynorsk i offentlegheita.
— No håpar eg at denne kåringa kan bidra til at det blir lettare å vera ung nynorskbrukar i framtida, gjennom å visa at dette er eit språk for alle, seier leiar i Norsk Målungdom Gunnhild Skjold i pressemeldinga.
Om ein kjenner nokon ein meiner fortener tittelen, kan ein sende eit tips på e-post merka nynorsktalent» til tips @ framtida.no, eller sende ei melding på Instagram til @framtida.no – innan søndag 20. desember 2020.
