Opprettar stilling for å utvikle tomter
Kommunestyret støtta kommunedirektør Yngve Folven Bergesen sitt ønske om å få ein tilsett tilretteleggjar for areal til bustad- og næringsutvikling i kommunen. Behovet fekk sjølv Frp og Mats Årvik til å fråvike sine prinsipielle motstand mot utviding av administrasjonen.
— Me i Frp er ikkje glade i å opprette stillingar, men her er me positive, sa Årvik.
Stillinga er ein del av ei satsing på moglegheitsutvikling som blei vedteke i budsjett og økonomiplan for 2023-2026. Her blei det sett av 500.000 kroner, samt opna for å ta i bruk leigeinntekter frå næringsareal. Desse inntektene gjer at den vedtekne potten kom opp i éin million.
Annonse
Ønske frå bygdene
Høgre fremja eit alternativt forslag der ein heller skulle gå i dialog med næringslivet om å levere nødvendige tenester for mogelegheitsutvikling gjennom Medvind24.
— Me har dei same målsetjingane, men ulik veg for å komme der, sa Modolf Haraldseid (H).
Fleire talarar under behandlinga av saka i både formannskap- og kommunestyremøte understreka at dei synest Medvind24 gjer ein god jobb for bygda, men Årvik og fleire trur det er nødvendig å ha ein person innan kommunen som held styr på tråane. Politikarane merkar at tomteutvikling opptar folk.
Annonse
— Me høyrte på folkemøta i samband med skulesaka at det er eit sterkt ønskje om tomte- og næringsutvikling i bygdene, fortalde Jan Idar Haugen (Sp).
Høgre sitt forslag fekk sju stemmer, men fall i voteringa. Den nye stillinga vil vere underlagt kommunalsjef for samfunnsutvikling. Også i den rolla vil det komme ein ny person, ettersom Anne Sofie Sandvik skal bli avdelingsleiar ved avdelinga samfunnsutvikling og infrastruktur på Norconsult sitt kontor i Haugesund 1. april.
