Omstridd kraftline på høyring
Som Grannar melde 8. februar i år, går Noregs vassdrags- og energidirektorat (NVE) inn for å bygging av den omstridde 420 kV-kraftlina som Statnett har søkt om å bygge frå Blåfalli i Kvinnherad, via Etne og Vindafjord, til Haugaland Næringspark i Tysvær. Dette utan bruk av sjøkabel på deler av strekninga. Sjøkabel er noko mellom anna ei aksjonsgruppe i Etne har kjempa for, i håp om å spare urørt natur i Etnefjella. NVE tilrår mellom anna trasé over dei fram til no urørte Strypeheiene i Etnefjella. Det er olje- og energidepartementet (OED) som no har overtatt sakshandsaminga. Dei har no sendt NVE si innstilling ut på høyring. Departementet presiserer at dei har tilgang til alle tidlegare høyringsuttalar i saka, og ber om at eventuelle nye høyringsuttalar blir avgrensa til NVE si innstilling. Departementet vil gjennomføre ei synfaring i samband med høyringa. Dato for synfaring er ikkje klart enno, men frist for å gi høyringsuttale er sett til 19. juni i år.
