Nytt liv i bestemors hus

I det koselege 60-tals huset til Nora Johanson Solberg sine besteforeldre sit minna frå barndommen framleis sterkt i veggene. Den store hagen med frukttre, bærbuskar og gamle prydvekstar som omkransar det gråmåla huset ligg om lag som den var då bestemor Aslaug levde, og den lune kaffikroken i enden av hagen byr framleis på ein fantastisk utsikt over fjorden. Huset som blei påbygd med nye kvistar på starten av 1990-talet, har fått nytt tak, nye vindauge eit strøk maling og ny kledning enkelte stader etter at dei nye eigarane overtok. Men elles er det meste som før.

Det er først når ein tar steget over dørterskelen og inn i hovudetasjen at endringane kjem til syne. Innvendig har huset fått seg eit skikkeleg ansiktsløft. Heile hovudetasjen er bygd opp på nytt. Vegger er flytta, eit lunande lag isolasjon er kome på plass, nytt moderne kjøkken og bad er montert og i toppetasjen har veslejenta Sina (8 månader) fått sitt eige kombinerte sove-og leikerom.

— Me har gjort alt arbeidet sjølv, med unntak av sparkling og maling innvendig, seier Nora som er utdanna tømrar og har sitt daglege arbeid ved Vigor bygg i Skånevik. Sambuaren Geir Vimme er røyrleggjar, og saman har dei brukt alle sine ledige stunder på oppussingsprosjektet.

— Me har budd her i eitt år og held på litt gradvis. Ting blei sett litt på vent då jenta kom. Nå held me på med eit par soverom og ei loftstove oppe, seier ho.

Seinare står kjellaren for tur. Her skal det etter planen bli soverom og nytt vaskerom.

Samlingspunkt

Den tidlegare heimen til besteforeldra har vore familien sitt samlingspunkt i alle år. Også etter at Aslaug gjekk bort har huset vore brukt av familien. Difor var det ekstra kjekt for Nora å føra familietradisjonen vidare.

— Me var litt i tenkeboksen om me skulle overta. Huset hadde stått tomt sidan 2020, men det verka som eit spennande prosjekt. Eg har mange gode minne frå plassen og det ville vore stusseleg om det skulle bli selt ut av familien, seier Nora.

Hage

Huset, som har tre etasjar og ei grunnflate på rundt 120 kvadrat, er omkransa av ei stor tomt på 1,2 mål. I den eine enden av hagen er det planta frukttre og bærbuskar, mens resten består av plen og nokre prydbuskar. Innimellom dukkar det opp spor av bestemors gamle planter og nå på vårparten er det påskeliljer og krokus som kikkar opp av jorda. Sambuarparet har ennå ikkje heilt klart føre seg korleis hagen skal bli i framtida, men ein ny terrasse og nytt inngangsparti står høgt på ønskjelista.

— Me har planar om ny terrasse i sommar. Hagen får koma etter kvart, seier 27-åringen.

Pengar spart

Å byggja nytt hus i dag er svært kostbart. Å restaurera eldre hus er eit godt alternativ og stadig fleire gjer som Nora og Geir, og kjøper brukt som kan pussast opp. Ikkje alle har moglegheit til å ta seg av oppussingsarbeidet for eiga hand, men sjølv om ein må leige inn fagfolk til det meste vil det bli billigare enn å byggja heilt nytt.

— Det har blitt rimelegare å pussa opp gamalt, seier Nora som om eit par veker skal tilbake i sin faste jobb som tømrar. Det gleder ho seg til.

— Tømrar er eit spennande og kjekt yrke, seier ho.