Nye moglegheiter i ungt tilbod
Alle i Etne kommune mellom 11 og 15 år (fødd i 2010–2014) har 900 kroner tilgjengeleg til bruk på organisert fritidsaktivitet gjennom fritidskortet. No kan kortet nyttast på endå fleire populære tilbod.
Dei nye stadene der ein kan nytte kortet, er utebassenget Sjøkanten Trivsel i Skånevik, Havreberg Coaching sine treningssenter på Norheim og i Ljoshallbygget, Etne Fysioterapi og Trening på Etne Senter, og treningstilbodet til Skånevik Kultur- og Idrettshall. Dette opplyser Etne kommune på nettsida si.
Ordninga med det lokale fritidskortet i Etne startar med ein prøveperiode på to år, 2024 og 2025. Fritidskortet kan brukast på organisert aktivitet, til dømes kontingent eller eigenandel for deltaking på arrangement og cupar. Ein organisert aktivitet skal vera planlagd med eit program, ha ein leiar som styrer aktiviteten, og ha minimum seks treffpunkt i halvåret.
Annonse
Dersom ein alt har betalt faktura for medlemskontingent og/eller eigenandel til cup, stemne eller turnering, kan ein få refusjon for inntil 900 kroner. For å hente ut fritidskortet må du oppretta ein brukar på etne.aktiv-fritid.no.
Søsken får eit fritidskort kvar. Pengane på fritidskortet høyrer til kvart einskild barn, og dei kan ikkje overførast til søsken eller andre barn.
