Ny grillhytte på Haukreidtjørna
Rundt femti personar tok turen til Haukreidtjørna i Sandeid då den nye grillhytta vart offisielt opna laurdag. Fokus Sandeid stod bak arrangementet, der dugnadsfolk, grunneigarar, kommunen og Sandeidbuen feira gåva med grillfest. – Dette er eit bevis på at me kan skape noko saman, sa leiar i Fokus Sandeid, Ingvar Gjærde.
– Det er ei stor glede å ynskje dåke alle velkomne til opninga av ein heilt spesiell plass. På den vakre Haukareidtjørna har me fått ei grillhytte som er eit naturleg samlingspunkt for alle som treng ly, ein pause eller berre ein stad å nyte matpakken, sa Gjærde til dei frammøtte.
Hytta vart løfta på plass med helikopter i slutten av august, og er gitt som gåve til bygda av AdmMit Aktiv AS ved Rune Furseth, som òg sponsa transporten.
Annonse
– Det er eit løft for folkehelsa, og ein del av vårt rike turterreng som me ser rundt oss. Me er liksom på høgfjellet her, la Gjærde til, før han retta ein stor takk til Furseth, grunneigarane og ikkje minst dugnadsgjengen.
– Så har eg lyst å rette ei takk til Vindafjord kommune for rask og positiv saksbehandling, sa Gjærde.
Vindafjord kommune har også bidrege med 25.000 kroner, som skal gå til blant anna stiar og anna arbeid ved hytta, som ligg rundt 400 meter over havet.
– Fantastisk dugnadsånd
Annonse
Det tok altså ikkje meir enn ei veke frå prosjektet blei sett i gang, til hytta stod klar. På den veka blei det sendt søknad frå Fokus Sadneid, godkjent søknad frå kommunen, henta inn løyve frå grunneigarar, transportert hytta med helikopter, og satt på plass.
Dugnadsarbeidet har vore omfattande, leia av Lars Kristian Vestbø, med god hjelp frå Knut Furseth, Olav Lillehammer, Kåre Furseth og fleire, opplyser Gjærde, som sjølv har vore aktivt med.
– Dugnadsånda har vore fantastisk som alltid i Sandeid. Spør du folk om noko, så kjem dei. Det er god dugnadsånd. Det ser me, seier Gjærde til Grannar.
Nøgd med plassering
Kvifor det blei valt at hytta skulle ligge på Haukreidtjørna fortel Gjærde at var litt tilfeldeg, men at dei er nøgde med plasseringa.
– Haukreidtjørna er ein del av Ut på tur 2025» i regi av kommunen. Så var det snakk om kvar hytta skulle ligge, og så var det ein luring som sa at “her måtte det vere plass til ei hytte”. Så blei det her.
Annonse
– Det er greitt med ei hytte, for då kan du gå inn i all slags ver. Dette har vore frå gammalt av plassen dei går opp for å skeise, for den legg seg så tidleg, sa Gjærde.
– Det er ei betydeleg gåve som blir gitt til Sandeid frå AdmMit Aktiv og Rune Furseth. Så går me saman, det private og oss i det frivillige, og saman lagar me levande bygder. Derav, begrepet levande bygder», konkluderte Gjærde.
