Ny bygdeliste for heile Vindafjord

To parti, Ap og Bjoa bygdeliste, skiftar toppkandidat.

I begge partia er det andre forklaringar enn at politikarane ikkje vil stille igjen. Tove Elise Madland (Ap) er blitt stortingsrepresentant, og Kristian Resset (BBL) har flytta frå Vindafjord.

Ordførar Ole Johan Vierdal (Sp) avklara med nominasjonskomiteen i partiet for ei tid tilbake at han er klar for nye fire år dersom Sp igjen kjem i denne posisjonen.

Varaordførar Gustav Fosse (KrF) talde på knappane, men sa likevel ja til å stille igjen. Modolf Haraldseid (H) har tidlegare gitt klarsignal til å vere ordførarkandidat for partiet. Det same har Mats Årvik i Frp. SV sin eine representant, Guri Ravatn, tar også gjenval.

Ikkje bestemt namn

Uavhengig kommunestyrerepresentant Linda Skaar melde seg ut av Miljøparti dei grøne saman med ein del sentrale personar i lokalpartiet. Det er ikkje sikkert at nykomlingen i Vindafjord stiller liste igjen. Kontaktperson for MDG i Vindafjord, Olav Meyer Torstveit, seier det er usikkert, men ikkje utelukka at partiet stiller med liste igjen. Det vil bli gjort eit forsøk.

Bjoa bygdeliste vil ikkje forsvinne, men oppstå igjen som bygdeliste for heile Vindafjord. Det er målet til styret i BBL.

Anna Steinsland sit i kommunestyret for BBL, og ho opplyser at namnet ikkje er bestemt enno for den nye bygdelista. Namn som kan vere aktuelle er Bygdelista eller Vindafjord bygdeliste.

— Den skal vere for alle dei ni bygdene i Vindafjord. Etter kvart val seier veljarar at dei kunne tenkt å stemme på oss dersom ikkje namnet er knytt til Bjoa, seier ho.

Tanken er at det skal vere totalt opp til veljarane kven som skal bli valde inn, og det blir ingen kumuleringar.