NVE sitt store dilemma

Måndag leverte Statnett ein tilleggssøknad for milliard-prosjektet som handlar om bygging av nesten ni mil med ei ny 420 kV høgspentlinje frå Blåfalli i Kvinnherad, gjennom Etne og Vindafjord, og ut til Haugaland Næringspark i Gismarvik i Tysvær. Det er liten tvil om at Noregs vassdrags- og energidirektorat (NVE), som til sist skal godkjenne endeleg trasé, står overfor fleire krevjande vurderingar, kor dei uavhengig av konklusjon risikerer kritikk frå skuffa partar.

Tøffe val

Dei må mellom anna velje mellom omsynet til frilufts-elskarar som går tur i Strypeheiane, nordvest i det populære friluftsområdet mellom Etne og Sauda, og dei som bur eller har fritidsbustad i Litledalen. Dette gjeld for den delen av linja som Statnett vil bygge frå høgda over den eksisterande kraftstasjonen ved Litledalsvatnet og vidare vestover langs åssida på sørsida av Etnebygda, mot Høylandshovda.