NTP: Bakka-Mo er inne, men ikkje prioritert i første periode

Klokka 12 fredag la regjeringa fram Nasjonal transportplan for 2025-2036.

Og om nokon skulle vere i tvil om tidlegare lekkasjar: 8 kilometer ny E134 mellom Bakka i Stordalen og Mo, like aust for Etne sentrum er inne. Prosjektet er kostnadsberekna til 2,4 milliardar kroner.

Men prosjektet ligg ikkje inn blant dei som regjeringa vil prioritere i den første seksårsperioden. Det betyr at det neppe bli oppstart på Bakka Mo før tidlegast i 2032.

— Det betyr at ein ikke tar innover seg konsekvensen av auka trafikk med nye tunnelar i Rogfast og Røldal, seier stortingsrepresentant Terje Halleland (Frp) til Grannar.

Halleland seier at han vil arbeide på Stortinget for å få inn heile strekninga omtalt som Bakka – Solheim, med prioritert oppstart på Bakka – Mo.

Etne-ordføraren: — Ikkje uroa

Etne-ordførar Mette Heidi Bergsvåg Ekrheim (Sp) er ikkje uroa for at Bakka-Mo førebels ikkje er inne på prioritert plass i første seksårsperiode.

— Me veit jo at det å være inne i NTP på sett og vis berre er ein delsiger. Me er vande med at ting ikkje er heilt på plass før dei er det. Men ting kan og endra seg undervegs. Planar kan blir endra på, og om noko anna blir utsett er det ofte rom for andre å kome inn. Me må berre jobba på vidare på, seier ho.

— Du er ikkje uroa for at Bakka-Mo brått kan vere heilt ute igjen ved neste rullering av NTP?

— Nei, eg kjenner meg sikker på at Bakka-Mo kjem no. Eg kan ikkje så kva parti som vil fremja eit forslag om å ta det ut av NTP, seier ho.

Hordfast ute

Det andre store spørsmålet har vore status for E39 Hordfast. Her seier regjeringa at prosjektet skal regulerast ferdig, slik at det ved ein framtidig rullering kan bli prioritert.

Men det er altså ikkje prioritert utbygging i komande 12-årsperiode.

Samferdsleminister Jon-Ivar Nygård gjorde under framlegginga eit poeng av Hordfaste og nordre Møreaksen aleine ville spist opp meir enn 70 prosent av budsjettet om dei skulle vore med i denne perioden.

Regjeringa vil bruke 1.308 milliardar kroner dei neste tolv åra, ifølgje Nasjonal transportplan.

– Vi har måtta skyve på nokre av dei større prosjekta for å sørgje for at vi får aktivitet i heile landet, seier samferdselsminister Jon-Ivar Nygård (Ap).

Både glade og skuffa

Regionråda for Sunnhordland og Haugalandet jublar for at E134 mellom Bakka-Mo og Husøyvegen er inkludert i regjeringa sitt framlegg til Nasjonal transportplan (NTP), men uttrykkjer i ei pressemelding ein klar skuffelse over manglande prioritering av E39 Hordfast.

— Eg er glad for at E134 mellom Bakka og Mo saman med Husøyvegen er med i regjeringa sitt framlegg til NTP. Dette viser ein vilje til å investere i framtida til regionen vår, samt sikra ein etterlengta trygg og effektiv veg både for oss som bur i regionen, næringslivet, men ikkje minst for alle dei som har sitt daglege virke på vegen. Men me må halda fram å arbeida for at heile strekninga frå Bakka til Solheim vert regulert» seier Leiv Arne Marhaug, leiar for Haugalandsrådet.

Men er skuffa over at E39 Hordfast ikkje er prioritert i regjeringa sitt framlegg til NTP.

— E39 Hordfast skal fullføre kyststamvegen mellom Bergen og Stavanger, og er avgjerande for den framtidige utviklinga av både Sunnhordland og Haugalandet, så vel som for Vestlandet som heilskap. Mangelen på prioritering av dette prosjektet vil ha langtrekkande negative følgjer for den regionale utviklinga, og den grøne omstillinga ein ser i næringslivet, seier han.

André Mundal Haukås, leiar for Sunnhordlandsrådet seier at det er djupt skuffande at E39 Hordfast ikkje er prioritert.

— Med plass i utviklingsportefylgja skyv dei prosjektet ut i uvissa. Hordfast er avgjerande for samferdsleutviklinga i vår region og heile Vestlandet. Vi står saman, meir motiverte enn nokon gong, for å arbeide for at Hordfast blir prioritert i den endelege NTP av Stortinget. Utan Hordfast deler ein Vestlandet i to, og Sunnhordland vil med trygg og effektiv veg mot Stavanger snart snu seg sørover, seier han.

Les NTP her: