NRK droppa E134 i meiningsmåling om samferdsel

NRK Vestland presenterte sundag kveld resultatet av ei spørjeundersøking som Norstat har gjennomført på vegner av statskanalen sitt distriktskontor for Vestland.

Kva samferdsleprosjekt meiner du bør prioriterast?» blei 1001 innbyggarar i Vestland spurd om.

I svaralternativa kunne respondentane velgje Hordfast», Ny E16 mellom Bergen og Voss», Ingen av delane» eller Veit ikkje». Stamvegen E134 mellom Haugalandet og Austlandet, og som for tida er høgaktuell, med mellom anna Røldalstunnelen og Bakka-Solheim gjennom Etne og Vindafjord som kostbare delprosjekt, var ikkje eit av svaralternativa.

— Viser problemstillinga

Torsdag denne veka skal det vere eit stort folkemøte i Etne om framtida for nettopp E134. Til folkemøtet på Skakkesenteret kjem mellom anna utbyggingsdirektør i Statens Vegvesen Kjell Inge Davik og fleire stortingsrepresentantar. Terje Halleland (Frp) frå Vindafjord er ein av desse. Han har kjempa for E134 i heile si karriere som rikspolitikar, og reagerer på at NRK Vestland har hoppa bukk over E134 i spørjeundersøkinga som har fått stor merksemd torsdag.

— Det viser berre igjen at E134 er eit mykje viktigare for tema Rogaland enn det er for Vestland, og at ein må mykje lengre nord i Vestland for å få forståing for ønskjer om alternative aust-vest-samband seier han.

Halleland meiner mangelen på merksemd på E134 hos NRK Vestland i ei sak som dette bidreg til å flytte fokuset til politikarane vekk frå utfordringane på E134. Han minner difor om at internt i fylka, også i Vestland har fått fleirtal for E134, også i Vestland tidlegare.

—Så me får berre håpe at dei opprettheld det standpunktet, seier han.

— Upartisk

Også Etne-ordførar Mette Heidi Bergsvåg (Sp) Ekrheim reagerer på E134-mangelen i NRK Vestland si spørsmålsstilling.

— Dette føyer seg inn i rekkja av døme på NRK Vestland sin manglande upartiske fokus på samferdsleprosjekt i Vestland, meiner ho.

Etne-ordføraren er også fylkespolitikar, og sit i hovudutval for samferdsle og mobilitet i Vestland.

Ho meiner også at det er uheldig at enkeltprosjekt i Vestland stadig blir sett opp mot kvarandre i media, og er redd stadige diskusjonar om enkeltprosjekt internt i landsdelen gjer at Vestlandet blir taparen i konkurranse mot både jernbaneutbygging på Austlandet og store vegprosjekt i andre landsdelar.

Ho ønskjer seg eit større overordna fokus på veg-utfordringane på heile Vestlandet.

— Me må slå i bordet og seie at no er det Vestlandet i sin heilheit sin tur, meiner ho.

— Burde ha vore med

Vindafjord-ordførar Ole Johan Vierdal (Sp) meiner NRK Vestland si spørsmålsstilling er mangelfull når dei vel å ikkje ta med E134.

— E134 skulle absolutt vore med som eit svar-alternativ i NRK Vestland si spørjeundersøking. Men det viser vel noko av grunnen til at me ikkje har fått til noko på E134. Det får ikkje nok merksemd i konkurranse mot andre store prosjekt, seier han.

Vierdal legg til at det faktum at NRK-undersøkinga viser Hordfast blir nedprioritert av folk flest i Vestland ikkje overraskar han.

— Me har jo høyrt signala frå Bergen om at korkje Hordfast eller E134 er så viktig for bergensarane. Dei kan virke som dei er opptatt av å kome seg til Voss eller til hyttefelta på Hardangervidda, seier han.

Vindafjord-ordføraren er også klar på at Hordfast er eit viktig prosjekt, for heile Sørvestlandet, og viktigheita av å prioritere dette, og meiner ein bør minne om konklusjonen til tidlegare statsråd og Victor Normann.

— Han var klar på at det er ved å binde Vestlandet mellom Bergen, Haugesund og Stavanger saman at landsdelen bli sterkast, seier han.

— Redaksjonell vurdering

Distriktsredaktør Dyveke Buanes i NRK Vestland seier at dei som ein del valkampdekninga i fylket fann det redaksjonelt interessant å stille folk i Vestland spørsmål om kva av dei to største prosjekta, altså Hordfast eller Bergen-Voss, innbyggarane i Vestland meiner bør prioriterast.

— Burde ikkje E134, ein stamveg med sine kostbare prosjekt Røldalstunnelen og Bakka-Solheim tatt, med som eit svaralternativ når ein skal vurdere kva som bør prioriterast?

— Det er ikkje mangel på gode vegprosjekt i Vestland som kunne ha vore med som svaraternativ. Til dømes E39 Austre Ringveg, kor aksjonistar i Hylkje i Nordhordland til og med har stansa trafikken på E39 i protest mot planane, seier ho.

Ho understrekar at NRK Vestland er opptatt av samferdsel i heile fylket, og at ho ikkje kjenner seg att i kritikken frå Etne-ordføraren om manglande og upartisk fokus på samferdsleprosjekt i fylket.

— Alle samferdsleprosjekt i Vestland, også i Sunnhordland, er viktige for oss. Men me må ta redaksjonelle val kvar dag. Me har laga saker på E134 også, og eg håpar at det er den samla dekninga me blir målt på, seier NRK-redaktøren.