Nå kan du leige skiutstyr på Opheim og Fjellstøl

På Opheim og Fjellstøl står to flunkande nye redskapshus proppfulle med skiutstyr klar til utleige. Her kan barn og vaksne som ønskjer å leiga seg utstyr til skituren finna både ski, stavar og sko. Det einaste ein treng å gjera er å logga seg inn på nettportalen til utleigar, betale og få tilsendt kode til dørlåsen. Så er det berre å forsyna seg av det ein treng. For eitt års tid sidan plasserte Frilager Haugalandet ein skitilhengjar på Opheim fullasta med skiutstyr, men nå har utstyret fått permanent tilhaldsstad i den vesle trehytta. I tillegg er det sett opp liknande hytte på Fjellstøl.

— Ein bestiller på Frilager.no og får koden på e-post når ein har booka. Det er kjempeenkelt og ein får koden med ein gong, seier leiar i Frilager Haugalandet, Lene Solstad Apeland.

Både Fjellstøl og Opheim er populære friluftsområde som utlånsportalen av friluftsutstyr har valt å satsa på, og i løpet av vintermånadane er det skiutstyr som fyller utstyrsbodene. Til våren og sommaren kan skiutstyret bli byta ut med syklar og anna friluftsutstyr, og ved Olalia er planen å leggja ut kanoar til utleige. Frilager har i dag 6 aktivitetsplassar med tilbod om kanoutleige i distriktet og målet er å utvida tilbodet med ein ny plass i Vindafjord.