Mottekne med opne armar

Brødr. Mæland, Etne omsorgssenter, Sparebanken Norge, Etne Auto og MCE har vore vertskap for elevane fra Skånevik. Etneelevane skal besøka Knudsen Dørfabrikk og SMV. Så skal dei sjå på reinsesystemet som Johansen Rør har laga til utebassenget i Skånevik, og etter det stiller Larsen Bakeri og Sjøkanten Trivsel med boller og bassengbading for elevane.

— Me har lagt opp dette etter modell frå konseptet vårt russen rullar», kor avgangselevar frå vidaregåande får treffa lokale verksemder for å sjå på arbeidsmoglegheiter etter utdanningane deira er ferdige, seier Line Andersen.

Ho er prosjektleiar og forretningsutviklar i Medvind Næringshage med kontorstad i Ølensvåg, og ho kunne same morgon gi elevane eit praktisk døme på at nokre gonger endrar føresetnadene seg raskt, og at då er det handlekraft som gjeld.

— Me køyrde før klokka sju i dag tidleg fra Ølensvåg i innleigd buss mot Skånevik, men i 50-sona i Ølen ville ikkje bussen meir, seier ho.

I Skånevik måtte då kontaktlærar Anne Gunvor Ness og miljøterapeut Maren Handeland kasta seg rundt med å få tak i eit par foreldre, samt at dei sjølv køyrde eigne bilar med dei nitten elevane som passasjerar.

Andersen understrekar at Medvind ser det som ei sentral oppgåve å jobba aktivt med å synleggjera dei varierte jobbmoglegheitene Vindafjord og Etne har. Dei har tru på at det er rett å kommunisera med elevar heilt ned på ungdomsskulenivået.

Snikkarfaget

Andersen rosar velviljen frå verksemdene ho har kontakta, og først på programmet for elevane frå Skånevik var Brødr. Mæland AS. Dei vart godt tekne imot i dei nye lokala i Ljoshallbygget.

Under Thomas Rullestad sin kyndige informasjon om byggfaga, og om arbeidsgjevar Brødr. Mæland, var det eit lydhøyrt publikum, om enn ikkje så taletrengt. Opphaldet der vart avslutta med ein praktisk konkurranse kor elevane og dei to lærarane vart delt inn i fire lag.

Konkurransen var å spikra ein lang spiker ned i solid trevirke, og deretter saga eit stykke av emnet. Her var det nokre av elevane som var veldig treffsikre med hammaren, og det var ikkje berre gutar som utmerka seg.

— Byggfag er ikkje noko for meg, seier Juliana Haga Bull-Tornøe (14).

Klassevenninna Ingrid Synnøve Ebne (14), var interessert i bygg og interiør, og syntes det var interessant å høyra om karrieremoglegheitene i bransjen. Hennar interesse gjekk meir i retning av plan og teikning, og arkitekt vart nemnt med klår informasjon til journalisten om at ho berre går i åttande klasse og at mykje kan endra seg.

Opne

Sven Bjelland (14) var blant dei betre i dei praktiske øvingane, og han meinte at det var interessant å sjå ulike verksemder. Han er open for mykje, og trass i talent med hammar, har han ikkje spesiell interesse for tømring.

Niandeklassingen Lilly Åsheim Karlsen likte den gode innsatsen jentene gjorde i den praktiske konkurransen.

— Eg vil at jenter og gutar skal vera likestilte til alle stillingar, seier ho.

Innsatsen til jentene i den praktiske konkurransen meinte ho var eit godt døme på at ein må tona ned å omtalen av typiske kvinne- og mannsyrker.

Med engasjert informasjon om byggfaga, kan Thomas Rullestad, som er seljar hjå Brødr. Mæland, ha gitt ein og annan noko å tenke på. Godt akkompagnert av Lena Furdal, som har ei kombinert stilling med interiørdesign og administrasjon i firmaet, kan gryande interesse for byggfaga ha blitt skapt eller forsterka hjå nokre av elevane.

— Ofte er det heimen til folk me byggjer, og då er det kjekt og ansvarsfullt å vera samarbeidspartnar i ein viktig prosess som ikkje skjer så ofte i folks liv, seier Rullestad.

Han var tydeleg på utfordringane bransjen vil få med å tiltrekkja seg fagfolk, og at det derfor gir meining å bruka tid på dei unge elevane frå Skånevik. Dei sjølve tok seg luksusen, som 14- og 15-åringar kan tillata seg, med å lena seg godt tilbake i stolane og ta imot informasjon frå potensielle arbeidsgjevarar og la inntrykka bli tankar i eige hovud.