Mopedist forsøkte å flykta frå politiet – køyrde rusa og utan førarkort
Ein mann i 50-åra blei stoppa av politiet i Etne laurdag ettermiddag. Han skal både ha vore rusa, køyrd utan gyldig førarkort og forsøkt å unndra seg kontroll.
Publisert
Sist oppdatert
Ein politipatrulje frå Ølen stoppa klokka 17.00 ein mann i 50-åra på moped i Etne. Ifølgje operasjonsleiar Stine Haaversen-Westhassel i Sør-Vest politidistrikt prøvde mannen å unndra seg kontrollen då patruljen gav signal om å stansa.
Undersøkingar på staden viste at mannen køyrde i ruspåverka tilstand, og han måtte avlegga blodprøve. Politiet gjennomførte også andre nødvendige undersøkingar i samband med hendinga.
Annonse
I tillegg var mopeden utstyrt med falske kjennemerke. Mannen blir derfor meldt for fleire forhold: køyring i ruspåverka tilstand, køyring utan gyldig førarkort, unnlata å stansa for kontroll og dokumentfalsk.
Politiet har oppretta sak, opplyser operasjonsleiar.
