Menn vert råka hardare av sosial ulikskap

Me veit alt for lite om årsakene til gapet i levealder mellom rike og fattige, åtvarar professor.

I eit innlegg på nettstaden til Medisinsk fakultet ved Universitetet i Oslo, skriv professor Øyvind Næss at han er bekymra for at me veit alt for lite om kvifor rike, og særskild rike menn, lever mykje lengre enn dei med lite pengar.

I 2024 var venta levealder for kvinner 84,8 år, og 81,6 for menn. Det utgjer altså ein forskjell på 3,2 år. Gapet mellom fattige og rike menn er derimot på heile 13,8 år. For rike og fattige kvinner er forskjellen berre på 8,4 år.