Meiner vegen har gått ut på dato

— Det er ein europaveg som tida har sprunge fullstendig frå, seier Sigbjørn Gjelsvik (Sp).

Med seg på turen hadde han Geir Adelsten Iversen (Sp) i transportkomiteen. På vegen hadde dei eit lunsjmøte på Etne Tinghus. Der slutta stortingskollega Hans Inge Myrvold (Sp) seg til følget.

Vil ha fortgang

På møtet trefte stortingsrepresentantane sine partikollegaer Vindafjord-ordførar Ole Johan Vierdal, Etne-ordførar Mette Heidi Bergsvåg Ekrheim og Sjur Aakra som sitt Etne-kommunestyre. Tidlegare Sp-ordførar Sigve Sørheim i Etne var også på plass, men i denne samanhengen for å fortelje om sine erfaringar med å køyre skulebarn med minibuss som pensjonist. Dagleg leiar Petter Taraldsøy i Taraldsøy Transport fortalde om opplevinga av å køyre både skuleskyss og tungtransport. Det heile blei innleia av dagleg leiar Pål Kårbø i E134 Haukelivegen AS.

Kårbø starta presentasjonen med å vise til Vegvesenet si utgreiing og vegsambandet mellom Austlandet og Vestlandet i 2015, og vendte seg til Gjelsvik og Adelsten Iversen med eit ønske om at transportkomiteen sørger for at det blir laga ein oppdatert versjon. Han tok for seg status og planar i 2015, og ein del av kva som har blitt gjort sidan.

— Ting går bra, det går berre litt for seint, sa Kårbø.

At E134 Røldal-Seljestad-prosjektet er inne i regjeringa sitt forslag til statsbudsjett for 2024 gler Kårbø. Viktigheita av prosjektet illustrerte han med ein kraftig reduksjon i drivstoffbruk og slitasje på bilar for tungtransporten grunna 11 kilometer kortare køyrelengde og 1.000 færre høgdemeter. I lys av dette framheva Kårbø betre veg som ein del av det grøne skiftet.

Vilje til bompengar

Etter kvart blei fokuset vendt mot Etne- og Vindafjord-delen av E134. Det var brei semje om at dette er ein viktig veg for både folk og næringsliv, samt at den ikkje held tilfredsstillande standard. Situasjonen kjem ifølgje Kårbø til å bli enda verre når Rogfast blir ferdig, og trafikken aukar. Ei ytterlegare auke ser han for seg med realiseringa av prosjektet arm til Bergen.

I lys av situasjonen i dag og det som skal komme, fortalde Kårbo at han sakna Bakka-Solheim-prosjektet på prioriteringslista Vegvesenet spelte inn til politikarane sitt arbeid med Nasjonal transportplan (NTP) for 2025-2036 3. oktober. Dette forundra Sigbjørn Gjelsvik (Sp), som spurte om kva som var grunnen til Vegvesenet. Kårbø svara at forklaringa Vegvesenet gav var at det ikkje var lokal forankring for bompengefinansiering. Sidan det er prinsippvedtak om dette i både Etne og Vindafjord reagerte ordførarane på forklaringa.

Etne-ordførar Mette Heidi Bergsvåg Ekrheim sa at ho ikkje blei glad når bommen i Åkrafjorden blei fjerna, og omtalar det som svært utaktisk. Ho meiner det er lett for folk å forstå når ein betaler bompengar for betre veg, og får støtte frå Petter Taraldsøy frå Taraldsøy Transport.

— Hadde me vist at det blir veg, hadde me i bransjen gladeleg betalt, sa Taraldsøy.

Breitt ønske

Møtet gjorde inntrykk på Gjelsvik. Han har køyrt vegen nokre gonger, og har fått god kjennskap gjennom at Bakka-Solheim-prosjektet har blitt løfta innan partiet av blant andre ordførarane.

— Det er eit openbart behov for å få gjort noko. Dette er eit prosjekt som både kommunar og aktørar lokalt og fylka, så vel som me som parti, er opptatt av, seier Gjelsvik.

Han opplever vegen frå Ølen og til den gule stripa like før Stordalstunnelen som for dårleg. Nå vil Gjelsvik utforske korleis ein kan få gjort noko med vegen, og minner om at regjeringa og Stortinget held på med arbeidet med NTP for 2025-2036, utan å gi noko løfter. Han vil heller ikkje utala seg om når prosjektet potensielt kan starte opp.

Etter møtet køyrde følget vidare for å sjå meir av E134. Dei tok seg tid til ein stopp ved Håfoss bru frå 1936, som av mange blir trekt fram som eit av dei verste partia på heile europavegen. På eit vegmøte på Skakke i august opna både statssekretær Tom Kalsås (Ap) i Samferdselsdepartementet og ruteansvarleg Ellen Johnsen Haaberg for E134 i Vegvesenet for å starte med strekninga Mo-Bakka som eit første delprosjekt. Gjelsvik ønska ikkje å gi noko signal om moglege delprosjekt.