Med lidenskap for tatovering
I kjellaren heime i huset sitt i Skjold har Hans Christian Nonslid (34) rigga seg til med sitt eige tatoveringsstudio. Her tek han i mot kundar som ønskjer seg eit kunstferdig minne rissa inn på kroppen.
På benken inne i det vesle tatoveringsstudioet Skjold Bygde Tattoo i Skjoldavikvegen er Espen Rørtveit (33) klar for nok ein runde med stikkande nåler. I dag er det deler av underarmen som skal dekkast med svart blekk. Motivet er tatt frå eit dataspel han er svært glad i, og nå er det opp til tatovør Hans Christian Nonslid å skapa eit bilde som begge kan vera nøgd med.
— Eg har teikna mønsteret. Motivet har innslag frå spelet Zelda og nå skal eg teikna bakgrunnen, seier Nonslid og finn fram alt av utstyr som trengst for å leggja fargepigmenta inn under huda på kunden.
Hans Christian har hatt tatovering som jobb dei siste sju åra. Til dagleg driv han to tatoveringsstudio i Haugesund saman med ein kollega, men i desse dagar er han heimeverande med minstejenta på eitt år og prøver å ta imot oppdrag i ledige stunder heime.
